អាមេរិក៖ បន្ទាប់ពីការជំនួបតាមទូរស័ព្ទកាលពីថ្ងៃពុធរវាងមេដឹកនាំទាំងពីរ ជាលើកដំបូងចាប់តាំងពីជម្លោះការទូតបានផ្ទុះឡើងកាលពីសប្ដាហ៍មុន បារាំងក៏ត្រូវបានប្រកាសផងដែរថា ឯកអគ្គរដ្ឋទូតរបស់ខ្លួននឹងត្រលប់ទៅកាន់ទីក្រុងវ៉ាស៊ីនតោនវិញ។
កាលពីថ្ងៃពុធ សេតវិមានបានទទួលស្គាល់ថា ក្រុមមន្ត្រីអាមេរិកអាចពិភាក្សា និងប្រាស្រ័យទាក់ទងបានល្អជាមួយសមភាគីបារាំងរបស់ពួកគេ ជុំវិញកិច្ចព្រមព្រៀងនាវាមុជទឹកដើរដោយថាមពលនុយក្លេអ៊ែរជាមួយអូស្ត្រាលី ដែលបានបង្កជាការផ្ទុះជម្លោះការទូតជាមួយប្រទេសបារាំង។ នៅក្នុងសេចក្ដីថ្លែងការណ៍រួមមួយ បន្ទាប់ពីការសន្ទនាតាមទូរស័ព្ទរវាងប្រធានាធិបតី Joe Biden និងលោកប្រធានាធិបតីបារាំង Emmanuel Macron មេដឹកនាំទាំងពីរបាននិយាយថា ពួកលោកបានឯកភាពគ្នាថា ស្ថានភាពនេះនឹងទទួលបានអត្ថប្រយោជន៍ពីការពិគ្រោះយោបល់បើកចំហក្នុងចំណោមសម្ព័ន្ធមិត្ត ស្តីពីបញ្ហាផលប្រយោជន៍ជាយុទ្ធសាស្ត្រចំពោះប្រទេសបារាំង និងដៃគូអឺរ៉ុបរបស់យើង។ មេដឹកនាំទាំងពីរក៏បាននិយាយផងដែរថា ពួកលោកនឹងជួបគ្នាដោយផ្ទាល់នៅចុងខែតុលានេះ។
អ្នកនាំពាក្យសេតវិមានលោកស្រី Jen Psaki បានប្រាប់អ្នកយកព័ត៌មាននៅក្នុងសន្និសីទសារព័ត៌មានកាលពីថ្ងៃពុធថា លោក Biden បានទទួលស្គាល់ថា អាចមានការពិភាក្សាគ្នាកាន់តែស៊ីជម្រៅថែមទៀត ហើយជំនួបតាមទូរស័ព្ទដូចដែលខ្ញុំបានបញ្ជាក់នៅមុននេះ គឺជាការសន្ទនាតាមទូរស័ព្ទប្រកបដោយមិត្តភាព ហើយមានកិច្ចព្រមព្រៀងដែលយើងចង់បន្តទៅមុខទៀត នៅក្នុងទំនាក់ទំនងរបស់យើង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
