សេវាសង្គ្រោះបន្ទាន់កំពុងបង្កើនការទប់ស្កាត់គ្រោះទឹកជំនន់ដ៏មហន្តរាយនៅអឺរ៉ុបកណ្តាល និងខាងកើត បន្ទាប់ពីភ្លៀងធ្លាក់ខ្លាំងដ៏គំហុក បណ្ដាលឲ្យទឹកហៀរចេញពីទន្លេនានា និងបំផ្លិចបំផ្លាញផ្ទះសម្បែងរាប់ពាន់ខ្នង។ 

ទឹកជំនន់នៅតំបន់ ហ្គាឡាទី (Galati) ភាគអាគ្នេយ៍ប្រទេសរ៉ូម៉ានី បានឆក់យកជីវិតមនុស្សយ៉ាងហោចណាស់៥នាក់ ខណៈភ្លៀងបង្កឡើងដោយព្យុះបូរីស(Boris) បានបន្តវាយប្រហារនៅអឺរ៉ុបកណ្តាល ។  

ចំណែកនៅសាធារណរដ្ឋឆែកឯណោះវិញ ក្រុមហ៊ុនថាមពល CEZ បាននិយាយថា ទឹកជំនន់បាននាំឱ្យមានការជម្លៀសមនុស្សចេញពីលំនៅឋាន ហើយមនុស្ស ៥១.០០០ គ្រួសារនៅតំបន់ភាគខាងជើងរបស់ប្រទេសនេះ បានរងគ្រោះដោយការដាច់ចរន្តអគ្គិសនី។  

រីឯនោះប្រទេសប៉ូឡូញ ក៏បានជម្លៀសប្រជាជនមួយចំនួនចេញពីទីក្រុងហ្ល្គូកូឡាហ្ស៊ី (Glucholazy) ដែលជាទីប្រជុំជននៅជិតព្រំដែនប្រទេសឆែកផងដែរ បន្ទាប់ពីទឹកទន្លេហូរបុកខ្លាំងរហូតដល់បាក់ច្រាំង។

ប្រធានាធិបតីរ៉ូម៉ានី លោក គ្លូស ឡាហាននីស (Klaus Iohannis) បាននិយាយកាលពីថ្ងៃសៅរ៍ថា យើងកំពុងប្រឈមផលប៉ះពាល់នៃបម្រែបម្រួលអាកាសធាតុម្តងទៀត ដែលមានវត្តមានកាន់តែខ្លាំង នៅលើទ្វីបអឺរ៉ុប ដោយបង្កផលវិបាកយ៉ាងខ្លាំង៕