អ៊ុយក្រែន នៅថ្ងៃចន្ទ (ទី១៦ ខែកញ្ញា) នេះ បាននិយាយថា ខ្លួនបានស្នើសុំអង្គការសហប្រជាជាតិ (UN) និងគណៈកម្មាធិការអន្តរជាតិរបស់កាកបាទក្រហម (ICRC) ឲ្យចូលរួមក្នុងកិច្ចខិតខំប្រឹងប្រែងមនុស្សធម៌នៅតំបន់ Kursk របស់ប្រទេសរុស្ស៊ី បន្ទាប់ពីកងកម្លាំងអ៊ុយក្រែន បានបើកលុកលុយឆ្លងព្រំដែន។

កងទ័ពអ៊ុយក្រែន នៅតែឈរជើងក្នុងតំបន់ Kursk ក្នុងរយៈជាង ១ខែហើយ បន្ទាប់ពីបានបើកការវាយលុក ដែលប្រធានាធិបតីអ៊ុយក្រែន លោក Volodymyr Zelenskyy និយាយថា ទីក្រុងគីវ បានគ្រប់គ្រងតំបន់តាំងទីលំនៅប្រហែល ១០០កន្លែង។

រដ្ឋមន្ត្រីការបរទេស លោក Andrii Sybiha បាននិយាយថា លោកបានណែនាំក្រសួងរបស់លោកឲ្យអញ្ជើញ UN និង ICRC ជាផ្លូវការ ដើម្បីចូលរួមធ្វើការ នៅតំបន់ Kursk នៅពេលដែលលោកបានទៅទស្សនាតំបន់ Sumy ភាគឦសានអ៊ុយក្រែន កាលពីថ្ងៃអាទិត្យ (ទី១៥ ខែកញ្ញា)។ ក្រសួងបានបញ្ជាក់ថា ខ្លួនបានដាក់ចេញនូវសំណើនោះ។

ក្រសួងការបរទេស បានឲ្យដឹងនៅក្នុងសេចក្តីថ្លែងការណ៍ជាលាយលក្ខណ៍អក្សរថា ការអញ្ជើញត្រូវបានផ្ញើទៅ ICRC និង UN ដោយ «គិតគូរពីស្ថានភាពមនុស្សធម៌ និងតម្រូវការ ក្នុងការធានាឲ្យបានត្រឹមត្រូវនូវសិទ្ធិមនុស្សជាមូលដ្ឋាន នៅក្នុងដែនដីនៃតំបន់ Kursk»៕