ដោយបានស្រង់សម្តីពីឆ្មាំល្បាតឆ្នេរ ទីភ្នាក់ងារសារព័ត៌មាន Yonhap នៅថ្ងៃចន្ទ (ទី១៦ ខែកញ្ញា) នេះ បានរាយការណ៍ថា មនុស្ស ៣នាក់ បានបាត់បង់ជីវិត និង ៥នាក់ផ្សេងទៀត ត្រូវបានជួយសង្គ្រោះ បន្ទាប់ពីពួកគេបានប្រាប់ថា ទូកនេសាទ ១គ្រឿង បានលិចនៅក្នុងដែនទឹកនៃសមុទ្រភាគខាងលិចរបស់ប្រទេសកូរ៉េខាងត្បូង។

អ្នកស្លាប់ រួមមានជនជាតិកូរ៉េខាងត្បូង ២នាក់ និងជនជាតិឥណ្ឌូនេស៊ីម្នាក់ ដោយអ្នកទាំងនោះ បានបាត់បង់ជីវិត បន្ទាប់ពីបានបញ្ជូនទៅមន្ទីរពេទ្យ។

ការិយាល័យរបស់លោកប្រធានាធិបតិ បានឲ្យដឹងថា លោក Yoon Suk-yeol បានទទួលព័ត៌មានសង្ខេបអំពីឧបទ្ទវហេតុនៅព្រឹកថ្ងៃទី១៦ ខែកញ្ញានេះ ហើយលោកបានបញ្ជាឲ្យរដ្ឋមន្ត្រីមហាសមុទ្រ និងជលផល ហើយនិងប្រធានឆ្មាំល្បាតឆ្នេរ ពង្រាយបុគ្គលិក និងឧបករណ៍ដែលមានទាំងអស់ ដើម្បីធ្វើប្រតិបត្តិការជួយសង្គ្រោះ។

សារព័ត៌មាន Yonhap បានរាយការណ៍មុននេះថា ទូកនេសាទទម្ងន់ ៣៥តោន បានក្រឡាប់លិចនៅជិតទីក្រុង Gunsan ក្នុងខេត្ត North Jeolla នៅម៉ោងប្រហែល ៧:៣៦ព្រឹក (ម៉ោងក្នុងស្រុក) ដោយបានជំរុញឲ្យឧទ្ធម្ភាគចក្រ និងនាវាល្បាតចាប់ផ្ដើមប្រតិបត្តិការ៕