សកម្មភាពកម្សាន្តប្លែកៗជាច្រើនត្រូវបានដាក់ឱ្យដំណើរការនៅទីក្រុងធំៗទូទាំងប្រទេសចិន រួមទាំងក្នុងតំបន់រដ្ឋបាលពិសេសនៃទីក្រុងហុងកុង និងម៉ាកាវ ដើម្បីអបអរសាទរពិធីបុណ្យសែនព្រះខែ (បុណ្យពាក់កណ្តាលសរទរដូវ) ដែលប្រព្រឹត្តទៅនៅថ្ងៃអង្គារ (១៧ កញ្ញា) ឆ្នាំនេះ ដោយផ្តល់ឱកាសឱ្យអ្នកស្រុក និងអ្នកទេសចរទទួលបានអារម្មណ៍ដ៏ទាក់ទាញពីវប្បធម៌ប្រពៃណីជាតិចិន។

ពិធីបុណ្យសែនព្រះខែ គឺជាបុណ្យប្រពៃណីរបស់ជនជាតិចិន ដែលប្រារព្ធឡើងនៅថ្ងៃទី១៥ នៃខែទី៨ នៃប្រតិទិនច័ន្ទគតិរបស់ចិន ដើម្បីរំលឹកដល់ការជួបជុំក្រុមគ្រួសារ និងមិត្តភក្តិ ហើយឆ្នាំនេះ បុណ្យនេះត្រូវនឹងថ្ងៃទី១៧ ខែកញ្ញា ខណៈទិវាជាតិរបស់ចិន គឺនៅថ្ងៃទី០១ ខែតុលា។

ពិព័រណ៍ចង្កៀងគោម ដែលតំណាងឱ្យការចាប់ផ្ដើមនៃបុណ្យសែនលោកខែ និងទិវាជាតិ បានធ្វើឡើងក្នុងទីក្រុងប៉េកាំង កាលពីថ្ងៃអាទិត្យ។ នោះជាពិព័រណ៍ចង្កៀងគោមដ៏ធំបំផុតមិនធ្លាប់មាននៅក្នុងទីក្រុងប៉េកាំង ដោយបានតាំងបង្ហាញចង្កៀងគោមដ៏ស្រស់ស្អាតជាង ២០០ឈុត។ ចាប់ពីថ្ងៃចន្ទ របាំនាគភ្លើងប្រពៃណី នឹងសម្តែងរយៈពេល ៣ថ្ងៃនៅតំបន់ ថៃហឹង (Tai Hang) ក្នុងទីក្រុងហុងកុង។ របាំប្រពៃណីនោះបង្ហាញពីសត្វនាគបញ្ចេញពន្លឺដ៏ធំមួយដែលធ្វើពីធូបរាប់ពាន់ដើម ហើយលើកដោយមនុស្សរាប់រយនាក់។ របាំនាគភ្លើងត្រូវបានចុះក្នុងបញ្ជីបេតិកភណ្ឌវប្បធម៌រូបីជាតិរបស់ចិន ក្នុងឆ្នាំ២០១១។

នៅទីក្រុងម៉ាកាវ កន្លែងធំៗនានារួមទាំងព្រះវិហារបុរាណ សេន ផល (St. Paul) និងទីលានចតុរង្គ សេណាដូ (Largo Do Senado) ត្រូវបានតុបតែងដោយចង្កៀងគោមជាច្រើនប្រភេទ ដើម្បីអបអរសាទរពិធីបុណ្យសែនលោកខែនេះ ដែលទាក់ទាញមនុស្សជាច្រើនដើម្បីទៅទស្សនា និងថតរូប៕