កូរ៉េខាងត្បូង និងជប៉ុនបាននិយាយថា កូរ៉េខាងជើង បានបាញ់មីស៊ីលបាលិស្ទិករយៈចម្ងាយខ្លីជាច្រើនគ្រាប់នៅថ្ងៃពុធ (១៨ កញ្ញា) នេះដែលបានធ្លាក់ក្នុងសមុទ្រពីឆ្នេរភាគខាងកើតរបស់ខ្លួន ប៉ុន្មានថ្ងៃបន្ទាប់ពីទីក្រុងព្យុងយ៉ាង បានបង្ហាញកន្លែងចម្រាញ់សារធាតុអ៊ុយរ៉ានីញ៉ូម និងបានប្តេជ្ញាពង្រឹងឃ្លាំងអាវុធនុយក្លេអ៊ែររបស់ខ្លួន។

អគ្គសេនាធិការចម្រុះកូរ៉េខាងត្បូង (JCS) បាននិយាយថា មីស៊ីលទាំងនោះបានបាញ់ចេញពីឆ្នេរ គេឈុន (Kaechon) ភាគខាងជើងនៃរដ្ឋធានីព្យុងយ៉ាង នៅម៉ោងប្រហែល ៦:៥០ព្រឹក (ម៉ោងក្នុងស្រុក) ក្នុងទិសដៅភាគឦសាន។

កូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា «យោធារបស់យើងកំពុងរក្សាជំហរត្រៀមខ្លួនពេញលេញ ខណៈពេលដែលពង្រឹងការឃ្លាំមើល និងប្រុងប្រយ័ត្ន ព្រមទាំងត្រៀមខ្លួនសម្រាប់ការបាញ់បង្ហោះបន្ថែម និងការចែករំលែកព័ត៌មានយ៉ាងជិតស្និទ្ធជាមួយភាគីសហរដ្ឋអាមេរិក និងប្រទេសជប៉ុន»។

ប្រហែល ៣០នាទីក្រោយការជូនដំណឹងពីការបាញ់មីស៊ីលលើកដំបូង ឆ្មាំល្បាតឆ្នេរជប៉ុនបាននិយាយថា កូរ៉េខាងជើងបានបាញ់មីស៊ីលបាលិស្ទិកមួយទៀត ដោយបញ្ជាក់ថា មីស៊ីលនោះទំនងជាបានធ្លាក់ចូលសមុទ្រ។ ទីបញ្ជាការឥណ្ឌូប៉ាស៊ីហ្វិករបស់អាមេរិក បាននិយាយនៅលើបណ្ដាញសង្គម X ថា ខ្លួនបានដឹងពីការបាញ់បង្ហោះនោះ និងពិគ្រោះយោបល់យ៉ាងជិតស្និទ្ធជាមួយទីក្រុងសេអ៊ូល និងតូក្យូ។

គួររម្លឹកថា កូរ៉េខាងជើង បានបាញ់មីស៊ីលបាលិស្ទិករយៈចម្ងាយខ្លីជាច្រើនគ្រាប់កាលពីថ្ងៃព្រហស្បតិ៍សប្តាហ៍មុន ដែលជាការបាញ់បង្ហោះលើកដំបូងក្នុងរយៈពេលជាងពីរខែ ដែលក្រោយមកបានពិពណ៌នាថាជាការសាកល្បងប្រព័ន្ធបាញ់គ្រាប់រ៉ូកែត ពហុមុខងារ ប្រភេទថ្មី ៦០០មីលីម៉ែត្រ។ កូរ៉េខាងត្បូងបាននិយាយថា ការបាញ់បង្ហោះនោះអាចជាការសាកល្បងអាវុធសម្រាប់នាំចេញទៅកាន់រុស្ស៊ី ស្របពេលមានការពង្រឹងកិច្ចសហប្រតិបត្តិការយោធារវាងប្រទេសទាំងពីរ៕