បាល់ទាត់៖ ប្រតិភូមន្ត្រីសហព័ន្ធបាល់ទាត់ពិភពលោក បន្តដំណើរទស្សនៈកិច្ចពិនិត្យកន្លែងប្រកួតទូទាំងអាមេរិក ដោយប៉ុន្មានថ្ងៃមកនេះនៅហ្វីឡាដែលហ្វៀ ខណៈដំណើរការជ្រើសរើសក្រុងម្ចាស់ផ្ទះកំពុងដំណើរការ។
ដំណើរទស្សនៈកិច្ច ៨ក្រុងចាប់ផ្ដើមកាលពីសប្តាហ៍មុន ដោយចេញដំណើរពីទីក្រុងបូស្តុននឹងបញ្ចប់នៅទីក្រុងម៉ាយអាមីថ្ងៃព្រហស្បតិ៍។ លោក Victor Montagliani ប្រធានសហព័ន្ធបាល់ទាត់តំបន់អាមេរិក និងការ៉ាអ៊ីប និងជាអនុប្រធានសហព័ន្ធបាល់ទាត់អន្តរជាតិលើកឡើងថា ការពិត មិនថាទីក្រុងធំ រឺតូចនោះទេ បាល់ទាត់ពិភពលោកដល់ទីណាចាប់អារម្មណ៍ដល់ទីនោះ ពិសេសនឹងទាក់ទាញជនជាតិអាមេរិក ៣៥០លាននាក់ដែលរស់នៅក្នុងប្រទេសនេះ។ លោក Colin Smith ប្រធានគណៈកម្មការរៀបចំការប្រកួត និងព្រឹត្តិការណ៍បញ្ជាក់ដែរថា បាល់ទាត់ពិភពលោកជាព្រឹត្តិការណ៍ដ៏ធំនៅពិភពលោក ហើយការចុះពិនិត្យទីក្រុងនាពេលនេះ ដោយពិនិត្យគ្រប់ជ្រុងជ្រោយ គ្រប់វិស័យ ដើម្បីឱ្យដឹងថា តើទីក្រុងហ្វីឡាដែលហ្វៀទទួលបាល់ទាត់ពិភពលោកយ៉ាងម៉េច ពេលដែលត្រូវសម្រេច។
លោក Victor Montagliani បន្ថែមទៀតថា យើងពិតជាមានការលំបាកក្នុងការសម្រេចចិត្ត តែយ៉ាងណាជឿជាក់លើសមត្ថភាពទីក្រុងនីមួយៗក្នុងការរៀបចំ។ សូមជម្រាបជូនថា ក្រុមការងារ FIFA នឹងបន្តដំណើរពិនិត្យនៅខែតុលាតំបន់ឆ្នេរភាគខាងលិចអាមេរិក មុនចេញទៅប្រទេសម្ចាស់ផ្ទះ ២ទៀត ម៉ិចស៊ិក និងកាណាដាខែវិច្ឆិកា។ បាល់ទាត់ពិភពលោក២០២៦ នឹងមាន ៤៨ក្រុមចូលរួមប្រកួត៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
