សេតវិមាន កាលពីថ្ងៃពុធ (១៨ កញ្ញា) បានព្រមានភាគីទាំងអស់ប្រឆាំងនឹងការកើនឡើងនៃជម្លោះនៅមជ្ឈិមបូព៌ា បន្ទាប់ពីការបំផ្ទុះឧបករណ៍ចាប់ទាក់ទងក្នុងថ្ងៃទីពីរនៅប្រទេសលីបង់ ដែលត្រូវបានកំណត់យ៉ាងទូលំទូលាយថាជាទង្វើរបស់អ៊ីស្រាអែល ផ្តោតលើក្រុមសកម្មប្រយុទ្ធហេសបូឡា។

អ្នកនាំពាក្យក្រុមប្រឹក្សាសន្តិសុខជាតិ លោក ចន ឃឺបប៊ី (John Kirby) បានប្រាប់អ្នកយកព័ត៌មានថា «យើងនៅតែមិនចង់ឃើញជម្លោះកាន់តែរីកធំ ហើយអាមេរិក នៅតែចូលរួមក្នុងកិច្ចប្រឹងប្រែងផ្នែកការទូតដើម្បីទប់ស្កាត់ការកើនឡើងនៃជម្លោះរវាងអ៊ីស្រាអែល និងក្រុមហេសបូឡា នៅលីបង់»។

អ៊ីរ៉ង់ ដែលគាំទ្រក្រុមហេសបូឡា បានទប់កំហឹងដោយដកថយពីការសងសឹកដ៏ធំបន្ទាប់ពីការវាយប្រហារមួយនៅក្នុងទីក្រុងតេអេរ៉ង់ ដែលបានសម្លាប់មេដឹកនាំនយោបាយដែលមកទស្សនកិច្ចរបស់ក្រុមហាម៉ាស។ អ៊ីស្រាអែល បានប៉ះទង្គិចជាប្រចាំជាមួយក្រុមហេសបូឡា ចាប់តាំងពីការវាយប្រហារថ្ងៃទី០៧ តុលា ដោយក្រុមហាម៉ាស ដែលក៏គាំទ្រដោយអ៊ីរ៉ង់ផងដែរ។

អ៊ីស្រាអែល ក្នុងសប្ដាហ៍នេះបានពង្រីកគោលដៅដែលបានបញ្ជាក់របស់ខ្លួននៃសង្គ្រាមនៅតំបន់ហ្កាហ្សា និងរួមបញ្ចូលការបញ្ជូនអ្នកស្រុកត្រឡប់ទៅសហគមន៍នៅភាគខាងជើងអ៊ីស្រាអែលវិញ ដែលត្រូវបានជម្លៀសដោយសារតែការវាយប្រហារដោយក្រុមហេសបូឡា របស់លីបង់។ រដ្ឋមន្ត្រីការពារជាតិអ៊ីស្រាអែល បញ្ជាក់ថា វិធីចុងក្រោយដើម្បីធានាការវិលត្រឡប់របស់អ្នកស្រុកភាគខាងជើងវិញ នឹងធ្វើឡើងតាមរយៈសកម្មភាពយោធា៕