ប្រធានាធិបតីសហរដ្ឋអាមេរិក លោក Joe Biden នឹងស្វាគមន៍ប្រធានាធិបតីប្រទេសអារ៉ាប់រួម លោក Sheikh Mohammed bin Zayed Al Nahyan នៅសេតវិមាន នៅថ្ងៃចន្ទ ទី២៣ ខែកញ្ញា សម្រាប់កិច្ចពិភាក្សាស្តីពីបញ្ហាជាច្រើន មានចាប់ពីសង្គ្រាមនៅតំបន់ហ្កាហ្សា បញ្ហាជម្លោះនៅក្នុងប្រទេសស៊ូដង់ និងការអភិវឌ្ឍន៍បញ្ញាសិប្បនិម្មិត(AI) ប្រកបដោយការទទួលខុសត្រូវ។

អ្នកនាំពាក្យសេតវិមាន លោក John Kirby បាននិយាយកាលពីថ្ងៃពុធ ទី១៨ ខែកញ្ញា ថា ដំណើរទស្សនកិច្ចនេះ នឹងជាលើកដំបូងដែលមិនធ្លាប់មាន ធ្វើឡើងដោយប្រធានាធិបតីនៃប្រទេសឈូងសមុទ្រអារ៉ាប់ ទៅកាន់ទីក្រុងវ៉ាស៊ីនតោន ហើយអនុប្រធានាធិបតី លោកស្រី Kamala Harris នឹងមានជំនួបដាច់ដោយឡែក ជាមួយមេដឹកនាំប្រទេសអារ៉ាប់រួម។

លោក Kirby បាននិយាយទៅកាន់អ្នកសារព័ត៌មានថា ជំនួបនេះក៏នឹងផ្តោតលើបញ្ហាអាកាសធាតុ ថាមពលស្អាត និងតួនាទីរបស់ប្រទេសអារ៉ាប់រួមដែលជាដៃគូក្នុងក្រុមនៃភាពជាដៃគូហេដ្ឋារចនាសម្ព័ន្ធសកលរបស់ក្រុមប្រទេសមានសេដ្ឋកិច្ចរីកលូតលាស់ទាំង៧ ឬG7 ។