អ្នកទទួលបានការតែងតាំងជាស្នងការការពារជាតិដំបូងរបស់សហភាពអឺរ៉ុប បានប្រាប់សារព័ត៌មានរ៉យទ័រនៅក្នុងបទសម្ភាសន៍មួយថា សហភាពអឺរ៉ុបត្រូវតែប្រញាប់ប្រញាល់បង្កើនការការពាររបស់ខ្លួន ខណៈរុស្ស៊ី អាចនឹងត្រៀមរួចរាល់សម្រាប់ការប្រឈមមុខដាក់គ្នាក្នុងរយៈពេលពី ៦ទៅ ៨ឆ្នាំខាងមុខនេះ។

លោក អង់ដ្រូស គូប៊ីឡូស (Andrius Kubilius) ដែលជាអតីតនាយករដ្ឋមន្ត្រីនៃប្រទេសលីទុយអានី អ្នកជិតខាងរបស់រុស្ស៊ី ត្រូវបានដាក់ឱ្យកាន់តំណែងនេះដើម្បីជំរុញឧស្សាហកម្មសព្វាវុធរបស់ទ្វីប ដោយធ្វើឱ្យបណ្តាប្រទេសសហភាពអឺរ៉ុបចំណាយប្រាក់កាន់តែច្រើនលើសព្វាវុធនៅអឺរ៉ុប និងការទិញលក់រួមគ្នា ក៏ដូចជាដោយធ្វើឱ្យក្រុមហ៊ុនខ្លួនបង្កើតកិច្ចសហប្រតិបត្តិការបន្ថែមទៀតឆ្លងកាត់ព្រំដែន។

តំណែងថ្មីនេះឆ្លុះបញ្ចាំងថាបញ្ហាសន្តិសុខបានឡើងដល់កំពូលនៃរបៀបវារៈនយោបាយរបស់សហភាពអឺរ៉ុប ចាប់តាំងពីប្រតិបត្តិការយោធារបស់រុស្ស៊ី ក្នុងឆ្នាំ២០២២ លើអ៊ុយក្រែនមក។ លោក Kubilius ដែលជាអ្នករិះគន់រុស្ស៊ី និងជាអ្នកគាំទ្រអ៊ុយក្រែន បាននិយាយកាលពីថ្ងៃពុធ (១៨ កញ្ញា) ថា «បណ្ដារដ្ឋមន្ត្រីការពារជាតិ និងឧត្តមសេនីយណាតូ យល់ស្របថា លោក វ្ល៉ាឌីមៀ ពូទីន អាចត្រៀមខ្លួនរួចរាល់សម្រាប់ការប្រឈមមុខជាមួយណាតូ និងសហភាពអឺរ៉ុប ក្នុងរយៈពេល ៦ ទៅ ៨ឆ្នាំខាងមុខ»។

លោក Kubilius បន្តថា ការងារដំបូងរបស់លោកជាស្នងការ នឹងធ្វើការរុករក រួមជាមួយនឹងប្រមុខការទូតរបស់សហភាពអឺរ៉ុប លើធនធានអ្វីដែលសហភាពអឺរ៉ុបត្រូវការដើម្បីត្រៀមខ្លួនសម្រាប់ការប្រកួតប្រជែងផ្នែកយោធា។ ប្រមុខការពារជាតិសហភាពអឺរ៉ុបថ្មីរូបនេះមានបំណងបញ្ចប់ការសិក្សាស្រាវជ្រាវនោះក្នុងរយៈពេល ១០០ថ្ងៃដំបូង៕