យោងតាមការវិភាគទិន្នន័យរបស់សារព័ត៌មានរ៉យទ័រ និងប្រភពស្និទ្ធនឹងក្រសួងសេដ្ឋកិច្ចបានឱ្យដឹងថា អាល្លឺម៉ង់ បានផ្អាកការនាំចេញសព្វាវុធសង្គ្រាមថ្មីៗទៅកាន់អ៊ីស្រាអែល ខណៈខ្លួនកំពុងដោះស្រាយបញ្ហាប្រឈមផ្លូវច្បាប់។

ប្រភពស្និទ្ធនឹងក្រសួងបានដកស្រង់សម្តីមន្ត្រីជាន់ខ្ពស់រដ្ឋាភិបាលថា ខ្លួនបានបញ្ឈប់ការងារលើការអនុម័តអាជ្ញាប័ណ្ណនាំចេញអាវុធទៅអ៊ីស្រាអែល ដោយសារសម្ពាធផ្នែកច្បាប់ និងនយោបាយពីបណ្ដឹងផ្លូវច្បាប់ដែលលើកហេតុផលថា ការនាំចេញបែបនេះពីអាល្លឺម៉ង់ បំពានច្បាប់មនុស្សធម៌។

រដ្ឋាភិបាលអាល្លឺម៉ង់ បានចេញសេចក្តីថ្លែងការណ៍មួយបន្ទាប់ពីរឿងនេះត្រូវបានចុះផ្សាយ ដោយបន្តអះអាងថា ពុំមានការធ្វើពហិការអាវុធប្រឆាំងនឹងអ៊ីស្រាអែលទេ។ កាលពីឆ្នាំមុន អាល្លឺម៉ង់បានអនុម័តការនាំចេញអាវុធទៅអ៊ីស្រាអែល មានតម្លៃ ៣២៦,៥លានអឺរ៉ូ (៣៦៣,៥លានដុល្លារ) រួមទាំងឧបករណ៍យោធា និងអាវុធសង្គ្រាម ដែលកើនឡើង ១០ដងពីឆ្នាំ២០២២ នេះបើយោងតាមទិន្នន័យពីក្រសួងសេដ្ឋកិច្ចដែលអនុម័តអាជ្ញាប័ណ្ណនាំចេញ។

ទោះជាយ៉ាងណាក៏ដោយ ការអនុម័តបានធ្លាក់ចុះនៅឆ្នាំនេះ ដោយមានតម្លៃត្រឹមតែ ១៤,៥លានអឺរ៉ូប៉ុណ្ណោះដែលត្រូវបានផ្តល់ឱ្យពីខែមករា ដល់ថ្ងៃទី២១ ខែសីហា នេះបើយោងតាមទិន្នន័យដែលផ្តល់ដោយក្រសួងសេដ្ឋកិច្ចក្នុងការឆ្លើយតបទៅនឹងសំណួររបស់សភា ខណៈប្រទេសអឺរ៉ុបមួយចំនួនក៏កាត់បន្ថយការនាំចេញអាវុធទៅអ៊ីស្រាអែលដែរ៕