បេក្ខជនប្រធានាធិបតីនៃគណបក្សសាធារណរដ្ឋ លោក Donald Trump បានអះអាងថា លោកកំពុងត្រូវបានវាយប្រហារ ដោយកងកម្លាំង «ក្រុមឆ្វេងនិយមជ្រុល» ហើយបានប្តេជ្ញាថា នឹងធ្វើយុទ្ធនាការដោយមានគោលបំណងថ្មី នៅឯការជួបជុំយុទ្ធនាការផ្លូវការជាលើកដំបូងរបស់លោក ចាប់តាំងពីមានការពោលអះអាងពីការប៉ុនប៉ងធ្វើឃាតលើកទី២ កាលពីថ្ងៃទី១៥ ខែកញ្ញា។

ដោយនិយាយទៅកាន់ហ្វូងមនុស្សដែលមានសំឡេងអឹង ក្នុងទីក្រុង Uniondale (យូញៀនដែល) រដ្ឋ New York ដែលមានចម្ងាយ ៤៨គីឡូម៉ែត្រពីទីក្រុង Manhattan លោក Trump បានប្រាប់ថា៖ «ការប្រឈមនឹងសេចក្ដីស្លាប់ទាំងនេះ មិនបានបំបាក់ឆន្ទៈរបស់ខ្ញុំនោះទេ។ ផ្ទុយទៅវិញ ហេតុការណ៍នេះគ្រាន់តែមកជួយធ្វើឲ្យការតាំងចិត្តរបស់ខ្ញុំកាន់តែរឹងមាំខ្លាំងឡើងៗប៉ុណ្ណោះ»។ លោក Trump បាននិយាយនៅឯទីលានកីឡា Long Island ដែលប្រមូលផ្តុំដោយអ្នកគាំទ្រជាង ១០.០០០នាក់ បើទោះបីជារដ្ឋ New York ដែលមាននិន្នាការគាំទ្រគណបក្សប្រជាធិបតេយ្យខ្លាំង មិនត្រូវបានចាត់ទុកថា ជារដ្ឋប្រកួតប្រជែងនៅក្នុងការបោះឆ្នោតថ្ងៃទី៥ ខែវិច្ឆិកាក៏ដោយ។

លោក Trump មិនខ្ជះខ្ជាយពេលវេលាក្នុងការនិយាយយោងទៅលើការចាប់ខ្លួនខ្មាន់កាំភ្លើង កាលពីថ្ងៃទី១៥ ខែកញ្ញា ដែលអាជ្ញាធរចោទប្រកាន់ថា មានគម្រោងបាញ់ប្រហារលោក Trump ខណៈពេលដែលរូបកំពុងលេងវាយកូនហ្គោលនៅទីលានវាយកូនហ្គោលរបស់លោក ក្នុងទីក្រុង West Palm Beach រដ្ឋ Florida។ កាលពីខែកក្កដា ខ្មាន់កាំភ្លើងម្នាក់ផ្សេងទៀត បានធ្វើឲ្យលោក Trump រងរបួស ខណៈដែលលោកបានថ្លែងសុន្ទរកថានៅរដ្ឋ Pennsylvania។ ហើយលោក Trump បាននិយាយថា៖ «ឥឡូវនេះព្រះជាម្ចាស់ បានសង្គ្រោះជីវិតរបស់ខ្ញុំ។ «មិនមែនម្តងទេ ប៉ុន្តែ ២ដង»។

លោក Trump បានស្តីបន្ទោស «ក្រុមមានគំនិតអាក្រក់ឆ្វេងនិយមជ្រុល និងហិង្សា» សម្រាប់ការប៉ុនប៉ងយកជីវិតរបស់លោក ហើយក្រោយមកបានប្រើភាសាស្រដៀងគ្នា ដើម្បីពិពណ៌នាអំពីគូប្រជែងរបស់លោកនៅក្នុងការបោះឆ្នោត គឺលោកស្រី Kamala Harris បេក្ខជនខាងគណបក្សប្រជាធិបតេយ្យ។ តែយ៉ាងណាក្ដី អតីតប្រធានាធិបតីរូបនេះ មិនបានលើកឡើងពីភស្តុតាងណាមួយ ដើម្បីគាំទ្រដល់ការអះអាងរបស់លោក ដែលថា «ក្រុមឆ្វេងនិយមជ្រុល» គឺជាអ្នកទទួលខុសត្រូវ ចំពោះការប៉ុនប៉ងលើជីវិតរបស់លោកនោះឡើយ។

បុរសម្នាក់ឈ្មោះ Ryan Routh វ័យ ៥៨ឆ្នាំ ត្រូវបានចោទប្រកាន់ពីបទឧក្រិដ្ឋកម្មទាក់ទងនឹងការកាន់កប់កាំភ្លើង បន្ទាប់ពីរូបលោកត្រូវបានចាប់ខ្លួន កាលពីថ្ងៃអាទិត្យចុងសប្ដាហ៍កន្លងមក៕