ប្រព័ន្ធព្យុះ ដែលបានបំផ្លិចបំផ្លាញទូទាំងតំបន់ភាគកណ្តាលអឺរ៉ុប បានបង្កទឹកជំនន់ថ្មីនៅតំបន់ភាគខាងជើង Emilia-Romagna ប្រទេសអ៊ីតាលីនាថ្ងៃព្រហស្បតិ៍នេះ បង្ខំឲ្យមនុស្សចាកចេញពីផ្ទះសម្បែងរបស់ពួកគេ ហើយសាលារៀន បានបិទទ្វារ ។

អភិបាលតំបន់ចាំផ្ទះលោក Irene Priolo បាននិយាយប្រាប់វិទ្យុរដ្ឋ RAI ថា មនុស្សប្រហែល ១ពាន់នាក់ ត្រូវបានជម្លៀសខ្លួន បើទោះបីជាវាជាតួលេខទាបជាងច្រើន បើធៀបនឹងទឹកជំនន់ធំ ដែលបានញាំញីតំបន់ Emilia-Romagna កាលពីឆ្នាំមុនក៏ដោយ ។

នៅទីក្រុង Lugo ដែលមានពលរដ្ឋរស់នៅប្រហែល ៣ម៉ឺននាក់ ស្ថិតនៅភាគខាងលិចទីក្រុង Ravenna ក្រុមអាជ្ញាធរ បានបញ្ជាឲ្យជម្លៀសខ្លួនអ្នកស្រុកទាំងអស់នៅផ្ទះជាន់ក្រោម ក្រោយទន្លេក្នុងស្រុក Senio បានបាក់ច្រាំងរបស់វា ។

រយៈពេល ១សប្តាហ៍កន្លងមកនេះ ប្រព័ន្ធព្យុះសំពាធទាប Boris បណ្តាលឲ្យកើតមានទឹកជំនន់ដ៏អាក្រក់បំផុតក្នុងរយៈពេល ២សតវត្សរ៍ ចាប់ពីប្រទេសរ៉ូម៉ានី រហូតដល់ប្រទេសប៉ូឡូញ និងបានសម្លាប់មនុស្សយ៉ាងហោច ២៣នាក់ ។

ភ្លៀងធ្លាក់ខ្លាំង បានបោកបក់លើតំបន់ Emilia-Romagna កាលពីថ្ងៃពុធ បង្ខំឲ្យក្រុមអាជ្ញាធរ បិទទ្វារសាលារៀន និងផ្អាកសេវាកម្មរថភ្លើងមួយចំនួន ។

យោងតាមការអះអាងរបស់ក្រុមអាជ្ញាធរក្នុងស្រុក បានឲ្យដឹងថា ភ្លៀងធ្លាក់ខ្លាំង បានជន់លិចតំបន់តែមួយដែលបានរងផលប៉ះពាល់រួចទៅហើយដោយសារទឹកជំនន់ ២លើកកាលពីខែឧសភា ឆ្នាំ ២០២៣ ដែលបានសម្លាប់មនុស្ស ១៧នាក់ និងធ្វើឲ្យខូចខាតសរុបជាទឹកប្រាក់ ៩.៥ពាន់លានដុល្លារ ៕