ក្រុមហ៊ុនអាកាសចរណ៍ Delta របស់សហរដ្ឋអាមេរិក នៅថ្ងៃព្រហស្បតិ៍ (ទី១៩ ខែកញ្ញា) នេះ បានសុំអភ័យទោស បន្ទាប់ពីការហោះហើរថ្មីៗនេះ ត្រូវចុះចតជាបន្ទាន់ ដោយសារតែបញ្ហាសម្ពាធក្នុងកាប៊ីន ដែលប្រព័ន្ធផ្សព្វផ្សាយក្នុងស្រុក រាយការណ៍ថា ហេតុការណ៍នេះបានបណ្តាលឲ្យអ្នកដំណើរហូរឈាមតាមច្រមុះ និងត្រចៀក។

រដ្ឋបាលអាកាសចរណ៍សហព័ន្ធអាមេរិក បានឲ្យដឹងថា ខ្លួនកំពុងស៊ើបអង្កេតឧប្បត្តិហេតុ កាលពីថ្ងៃទី១៥ ខែកញ្ញា នៃជើងហោះហើរពីទីក្រុង Salt Lake ក្នុងរដ្ឋ Utah ភាគនិរតី ទៅកាន់ទីក្រុង Portland រដ្ឋ Oregon នៅតំបន់ប៉ាស៊ីហ្វិកភាគពាយ័ព្យ។

នៅក្នុងសេចក្តីថ្លែងការណ៍មួយដែលត្រូវបានផ្ញើទៅសារព័ត៌មាន AFP តាមអ៊ីម៉ែល (សារអេឡិកត្រូនិក) ក្រុមហ៊ុនអាកាសចរណ៍ Delta បានលើកឡើងថា យន្តហោះដែលផ្ទុកអ្នកដំណើរ ១៤០នាក់ «មិនអាចរងសម្ពាធឲ្យលើសពី ១០.០០០ហ្វីត» បានទេ។ ក្រុមហ៊ុនបានបន្ថែមថា បន្ទាប់ពីយន្តហោះបានចុះចត មនុស្ស ១០នាក់ ត្រូវបានត្រួតពិនិត្យ ឬព្យាបាលដោយបុគ្គលិកពេទ្យ។

សេចក្តីថ្លែងការណ៍បានរៀបរាប់ថា៖ «យើងសូមអភ័យទោសដោយស្មោះអស់ពីចិត្ត ចំពោះអតិថិជនរបស់យើង ដែលបានជួបប្រទះនឹងហេតុការណ៍ នៅលើជើងហោះហើរលេខ 1203 កាលពីថ្ងៃទី១៥ ខែកញ្ញា។ បុគ្គលិកអាកាសយានិក បានអនុវត្តតាមនីតិវិធីនានា ដើម្បីត្រឡប់ទៅទីក្រុង Salt Lake វិញ ជាកន្លែងដែលក្រុមបុគ្គលិករបស់យើង នៅលើដី បានជួយអតិថិជនរបស់យើងជាមួយនឹងតម្រូវការបន្ទាន់របស់ពួកគេ»។

ទូរទស្សន៍ KSL TV បានសម្ភាសអ្នកដំណើរដែលពិពណ៌នាថា ឃើញមនុស្សក្ដោបក្បាលដោយការឈឺចាប់ ឬហូរឈាមចេញពីត្រចៀក ឬច្រមុះរបស់ពួកគេ ដែលមិនយូរប៉ុន្មានបន្ទាប់ពីយន្តហោះបានហោះឡើង៕