បន្ទាប់ពីភាពមិនប្រាកដប្រជាខាងនយោបាយជាច្រើនខែក្រោយការបោះឆ្នោតនីតិបញ្ញត្តិមុនអាណត្តិមក ប្រទេសបារាំង កំពុងខិតកាន់តែជិតទៅរកការបង្កើតរដ្ឋាភិបាលថ្មីកាលពីថ្ងៃព្រហស្បតិ៍ (១៩ កញ្ញា) ខណៈលោកនាយករដ្ឋមន្ត្រី មីស្ហែល បានីយ៉េ (Michel Barnier) បង្ហាញសំណើគណៈរដ្ឋមន្ត្រីរបស់ខ្លួនដល់លោកប្រធានាធិបតី អ៊ីម៉ានុយអែល ម៉ាក្រុង (Emmanuel Macron)។

លោក Macron បានតែងតាំងលោក Barnier ដែលជាអតីតអ្នកចរចាប្រេហ្ស៊ីតរបស់សហភាពអឺរ៉ុប ជានាយករដ្ឋមន្ត្រីកាលពីពីរសប្តាហ៍មុន។ លោក Barnier បានជួបការលំបាកក្នុងការដាក់ឈ្មោះរដ្ឋាភិបាលថ្មី ដោយគូសបញ្ជាក់ពីភាពស្មុគស្មាញនៃទិដ្ឋភាពនយោបាយរបស់បារាំង បន្ទាប់ពីការសម្រេចចិត្តដ៏ខុសឆ្គងរបស់លោក Macron ក្នុងការអំពាវនាវឱ្យបោះឆ្នោតសភាមុនពេលកំណត់។

ការបោះឆ្នោតនៅដើមខែកក្កដា បានបន្សល់ទុកនូវសភាដ៏បែកបាក់ និងធ្វើឱ្យការរួបរួមនយោបាយពិបាកឈានដល់ ដែលបណ្ដាលឱ្យបារាំង ស្ថិតក្នុងកណ្តាប់ដៃរបស់រដ្ឋាភិបាលចាំផ្ទះ។ ឥឡូវនេះការបញ្ចប់ភាពជាប់គាំងនយោបាយគឺអាស្រ័យលើលោក Macron ក្នុងការអនុម័តគណៈរដ្ឋមន្ត្រីថ្មីរបស់លោក Barnier។

ការិយាល័យនាយករដ្ឋមន្រ្តីបាននិយាយថា អាទិភាពរបស់រដ្ឋាភិបាលនឹងរួមបញ្ចូលការធ្វើឱ្យប្រសើរឡើងនូវលទ្ធភាពនៃការចំណាយរបស់សាធារណៈជន ក៏ដូចជាការធានាសន្តិសុខ ការគ្រប់គ្រងអន្តោប្រវេសន៍ និងហិរញ្ញវត្ថុសាធារណៈឱ្យកាន់តែប្រសើរឡើង។

ការសម្រេចលើបញ្ជីឈ្មោះអ្នកដឹកនាំការិយាល័យរដ្ឋសំខាន់ៗរបស់បារាំង បាននឹងកំពុងមានការប្រកួតប្រជែង ជាពិសេសដោយសារតែរដ្ឋាភិបាលបន្ទាប់ទំនងជានឹងត្រូវគ្រប់គ្រងជុំនៃការកាត់បន្ថយការចំណាយ ឬការដំឡើងពន្ធដើម្បីកែលម្អភាពរញ៉េរញ៉ៃនៃសារពើពន្ធរបស់ប្រទេស៕