ប្រធានាធិបតីកូរ៉េខាងត្បូង លោក យូន សុក យ៉ូល ( Yoon Suk Yeol) បាននិយាយនៅថ្ងៃសុក្រនេះថា កូរ៉េខាងត្បូង មិនពិចារណាពីការអភិវឌ្ឍអាវុធនុយក្លេអ៊ែររបស់ខ្លួនទេ ហើយផ្ទុយទៅវិញ គឺផ្តោតលើការពង្រឹងការការពារជាមុនជាមួយសហរដ្ឋអាមេរិក ដើម្បីទប់ទល់នឹងការគំរាមកំហែងនុយក្លេអ៊ែររបស់កូរ៉េខាងជើង។

លោក យូន បានធ្វើការអត្ថាធិប្បាយនៅក្នុងបទសម្ភាសន៍ជាមួយសារព័ត៌មានឆេក Hospodarske Noviny ក្នុងអំឡុងពេលដំណើររបស់លោក ទៅកាន់សាធារណរដ្ឋឆេក ដែលបានកើតឡើងមួយសប្តាហ៍បន្ទាប់ពីប្រទេសកូរ៉េខាងជើង បានបង្ហាញកន្លែងចម្រាញ់សារធាតុអ៊ុយរ៉ានីញ៉ូមរបស់ខ្លួន ជាលើកដំបូង។

លោក បានបញ្ជាក់ជាថ្មីនូវការប្តេជ្ញាចិត្តរបស់កូរ៉េខាងត្បូងចំពោះក្រុមប្រឹក្សានុយក្លេអ៊ែរ ដែលត្រូវបានបង្កើតឡើងក្នុងកំឡុងកិច្ចប្រជុំកំពូលជាមួយប្រធានាធិបតីអាមេរិក លោក ចូ បៃដិន ( Joe Biden) ក្នុងខែមេសា ឆ្នាំ ២០២៣។ នៅក្នុងខែកក្កដា មេដឹកនាំទាំងពីរ បានអនុម័តគោលការណ៍ណែនាំយុទ្ធសាស្ត្រនុយក្លេអ៊ែរ ដែលបង្ហាញពីការគាំទ្រយោធាធម្មតារបស់កូរ៉េខាងត្បូងសម្រាប់ប្រតិបត្តិការនុយក្លេអ៊ែររបស់សហរដ្ឋអាមេ  រិក ក្នុងករណីមានភាពអាសន្ន។

លោកប្រធានាធិបតី បាននិយាយនៅក្នុងបទសម្ភាសន៍ជាលាយលក្ខណ៍អក្សរដែលបានបកប្រែជាភាសាអង់គ្លេសថា៖«កូរ៉េខាងត្បូង បានបង្កើតយន្តការមួយដែលអាចទប់ស្កាត់ និងឆ្លើយតបយ៉ាងមានប្រសិទ្ធភាពចំពោះការគំរាមកំហែងនុយក្លេអ៊ែររបស់កូរ៉េខាងជើង ដោយមិនចាំបាច់មានអាវុធនុយក្លេអ៊ែរផ្ទាល់ខ្លួនទេ»។