ប្រភពការទូត និងសន្តិសុខ កាលពីថ្ងៃព្រហស្បតិ៍ (ទី១៩ ខែកញ្ញា) បានឲ្យដឹងថា ការវាយប្រហារដ៏ច្របូកច្របល់មួយដោយសម្ព័ន្ធរបស់ក្រុមអាល់កៃដា នៅក្នុងរដ្ឋធានីរបស់ប្រទេសម៉ាលី នាសប្តាហ៍នេះ បានសម្លាប់មនុស្សប្រហែល ៧០នាក់ ខណៈដែលខាងរដ្ឋាភិបាលមិនបានផ្តល់តួលេខ អំពីអ្នកស្លាប់ និងរបួសនោះឡើយ។

ក្រុមសកម្មប្រយុទ្ធនោះ បានវាយប្រហារសាលាបណ្តុះបណ្តាលនគរបាលពិសេស និងអាកាសយានដ្ឋាន កាលពីថ្ងៃអង្គារដើមសប្ដាហ៍នេះ ដោយបង្ហាញពីសមត្ថភាពរបស់ពួកគេ ក្នុងការវាយប្រហារ នៅកន្លែងសំខាន់របស់រដ្ឋធានីនៃប្រទេសម៉ាលី។ ប្រទេសនេះកំពុងប្រយុទ្ធប្រឆាំងនឹងការបះបោរដែលបានចាក់ឫសជាង ១ទសវត្សរ៍មុន នៅភាគខាងជើងរបស់ខ្លួន។

ទំហំ និងភាពស្មុគស្មាញនៃការវាយប្រហារនេះ ធ្វើឲ្យប៉ះពាល់ដល់ការអះអាងរបស់របបយោធាដែលកំពុងកាន់អំណាច ដែលថា សន្តិសុខបានប្រសើរឡើង ចាប់តាំងពីខ្លួនបានដកទ័ពបារាំង និងសហរដ្ឋអាមេរិក ហើយងាកទៅរករុស្ស៊ីជំនួសវិញ ដើម្បីសន្តិសុខ។

អ្នកការទូត ២នាក់ដែលបម្រើការនៅក្នុងតំបន់ ក្នុងនោះរួមទាំងម្នាក់ដែលមានមូលដ្ឋាននៅទីក្រុង Bamako បាននិយាយថា ចំនួនអ្នកស្លាប់ត្រូវបានគេជឿថា មាន ៧០នាក់។ តែយ៉ាងណាក្ដី សារព័ត៌មាន Reuters មិនអាចផ្ទៀងផ្ទាត់តួលេខនេះដោយឯករាជ្យបានឡើយ។ ចំណែកអ្នកការទូតទី៣ ដែលមានមូលដ្ឋាន នៅក្នុងតំបន់ បានប្រាប់ថា មនុស្សរាប់រយនាក់ ត្រូវបានគេជឿថា ស្លាប់ និងរបួស ហើយមន្ទីរពេទ្យ មិនមានគ្រែគ្រប់គ្រាន់ ដើម្បីព្យាបាលអ្នកនៅរស់៕