ក្រុមគ្រូពេទ្យបឋមសង្គ្រោះបានឲ្យដឹងថា កងកម្លាំងអ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ១៤នាក់ នៅក្នុងការវាយប្រហារដោយរថក្រោះ និងតាមអាកាសទៅលើតំបន់ភាគខាងជើង និងកណ្តាលនៃតំបន់ហ្កាហ្សាស្ទ្រីប នៅថ្ងៃសុក្រ (ទី២០ ខែកញ្ញា) នេះ ខណៈដែលរថក្រោះបានរុលទៅមុខបន្ថែមទៀតទៅកាន់ភាគពាយ័ព្យនៃទីក្រុង Rafah ក្បែរព្រំដែនជាមួយប្រទេសអេហ្ស៊ីប។

ការប្រយុទ្ធគ្នាឥតស្រាកស្រាន្ត រវាងពួកសកម្មប្រយុទ្ធអ៊ីស្រាអែល និងក្រុមហាម៉ាស នៅក្នុងដែនដីនេះ បានបន្តមាន សូម្បីតែនៅពេលមានជម្លោះក្នុងពេលដំណាលគ្នា នៅតំបន់ព្រំដែនលីបង់-អ៊ីស្រាអែល ដែលពាក់ព័ន្ធនឹងសម្ព័ន្ធមិត្តរបស់ក្រុមហាម៉ាស គឺក្រុមហេសបូឡា កាន់តែតានតឹងក៏ដោយ។

ទន្ទឹមនឹងនេះដែរ ប្រជាជនប៉ាឡេស្ទីនមួយចំនួនដែលផ្លាស់ទីលំនៅដោយសារការវាយលុករបស់អ៊ីស្រាអែលលើតំបន់ហ្កាហ្សា បាននិយាយថា ពួកគេភ័យខ្លាចថា ជំរុំឆ្នេរបណ្តោះអាសន្នរបស់ពួកគេ នឹងត្រូវបានជន់លិចដោយសារទឹករលកខ្លាំង។

មន្ត្រីសុខាភិបាលប៉ាឡេស្ទីនបាននិយាយថា ការបាញ់ផ្លោងដោយរថក្រោះអ៊ីស្រាអែល បានសម្លាប់មនុស្ស ៨នាក់ ហើយជាច្រើននាក់ទៀតរងរបួស ក្នុងជំរុំជនភៀសខ្លួន Nuseirat នៅភាគកណ្តាលនៃទំបន់ហ្កាហ្សា ខណៈមនុស្ស ៦នាក់ទៀត បានបាត់បង់ជីវិត នៅក្នុងការវាយប្រហារតាមអាកាសទៅលើផ្ទះសម្បែង ក្នុងទីក្រុងហ្កាហ្សា។

ក្រុមគ្រូពេទ្យបឋមសង្គ្រោះ បាននិយាយថា នៅភាគខាងជើងនៃទីក្រុង Beit Hanoun ការវាយប្រហាររបស់អ៊ីស្រាអែលទៅលើរថយន្តមួយគ្រឿង បានសម្លាប់ និងធ្វើឲ្យរបួសប្រជាជនប៉ាឡេស្ទីនជាច្រើននាក់។ គេនៅមិនទាន់ដឹងទឹថា តើអ្នកស្លាប់ប៉ុន្មាននាក់ជាយុទ្ធជន និងប៉ុន្មាននាក់ជាជនស៊ីវិល។

ជាមួយគ្នានេះដែរ អ្នកស្រុកបាននិយាយថា នៅទីក្រុង Rafah ភាគខាងត្បូង ជាកន្លែងដែលកងទ័ពអ៊ីស្រាអែល បានប្រតិបត្តិការតាំងពីខែឧសភាមកនោះ រថក្រោះបានរុលទៅមុខកាន់តែជ្រៅឆ្ពោះទៅកាន់តំបន់ភាគពាយ័ព្យដែលមានការគាំទ្រដោយយន្តហោះ៕