មេដឹកនាំកំពូលអ៊ីរ៉ង់លោក Ayatollah Ali Khamenei បាននិយាយកាលពីថ្ងៃសៅរ៍ថា អ៊ីស្រាអែល បានជះកំហឹងដ៏ល្ងង់ខ្លៅ និងការព្យាបាទរបស់ពួកគេលើកុមារតូចៗ អ្នកជំងឺនៅតាមមន្ទីរពេទ្យ និងនៅតាមសាលារៀនកុមារ ។ លោកថា អ៊ីស្រាអែលកំពុងប្រព្រឹត្តឧក្រិដ្ឋកម្មលើកុមារ ។

 សេចក្តីអត្ថាធិប្បាយរបស់លោកបានកើតមានឡើងរយៈពេល ១ថ្ងៃ ក្រោយអ៊ីស្រាអែល សម្លាប់មេបញ្ជាការជាន់ខ្ពស់មួយរូបរបស់ក្រុមហេសប៊ូឡា និងឥស្សរជនជាន់ខ្ពស់ជាច្រើនទៀតនៅក្នុងចលនាលីបង់ អំឡុងការវាយប្រហារតាមច្រកអាកាសរបស់ពួកគេ លើតំបន់ជាយក្រុង Beirut ដែលបណ្តាលឲ្យមនុស្សយ៉ាងហោច ៣១នាក់ បាត់បង់ជីវិត ។

 ការវាយប្រហារនេះ បានក្លាយជាការប៉ះទង្គិចមួយផ្សេងទៀតលើក្រុមហេសប៊ូឡាគាំទ្រដោយអ៊ីរ៉ង់ រយៈពេល ២ថ្ងៃក្រោយការវាយប្រហារលើឧបករណ៍ទាក់ទាក់ ប្រើប្រាស់ដោយសមាជិករបស់ពួកគេ ដោយបានសម្លាប់មនុស្ស ៣៧នាក់ និងមនុស្សរាប់ពាន់នាក់ផ្សេងទៀត រងរបួស ។

 ការវាយប្រហារទាំងនេះ ត្រូវបានគេជឿថា ធ្វើឡើងដោយអ៊ីស្រាអែល បើទោះបីជាពួកគេ ពុំបានបញ្ជាក់ថាទទួលស្គាល់ ឬច្រានចោលការការជាប់ពាក់ព័ន្ធរបស់ពួកគេក៏ដោយ ៕