នគរបាលបាននិយាយថា យ៉ាងហោចណាស់មនុស្ស ៤នាក់បានស្លាប់ និងរាប់សិបនាក់ទៀតរងរបួសនៅក្នុងការបាញ់ប្រហារទ្រង់ទ្រាយធំមួយនៅទីក្រុង ប៊ឺមីងហាម (Birmingham) រដ្ឋ អាឡាបាម៉ា (Alabama) សហរដ្ឋអាមេរិក។ 

មន្ត្រីនគរបាលក្រុង Birmingham លោក ទ្រូមែន ហ្វីតជើរ៉ល (Truman Fitzgerald) បាននិយាយថា «អ្នកបាញ់ប្រហារជាច្រើននាក់ បានបាញ់ជាច្រើនគ្រាប់ទៅលើមនុស្សមួយក្រុម» កាលពីល្ងាចថ្ងៃសៅរ៍នៅក្នុងតំបន់ ហ្វាយភ័ញសៅ (Five Points South) នៃទីក្រុង។ លោកបន្តថា នគរបាលបានរកឃើញសាកសពបុរស ២នាក់និងស្ត្រីម្នាក់នៅកន្លែងកើតហេតុ ហើយជនរងគ្រោះទី៤ បានស្លាប់ដោយសាររបួសធ្ងន់ធ្ងរដោយគ្រាប់កាំភ្លើងនៅមន្ទីរពេទ្យ។

លោក Fitzgerald បន្ថែមថា ក្រុមអ្នកស៊ើបអង្កេតកំពុងពិនិត្យទៅលើថា តើខ្មាន់កាំភ្លើងទាំងនោះបានដើរសំដៅទៅជនរងគ្រោះ ឬក៏បើករថយន្តតាមនោះ។ អាជ្ញាធរជឿជាក់ថា អ្នកបាញ់ប្រហារជាច្រើននាក់មានជាប់ពាក់ព័ន្ធ ហើយមិនទាន់មានការចាប់ខ្លួននៅឡើយទេ។ នគរបាលកំពុងស៊ើបអង្កេតពីមូលហេតុដែលអាចកើតមាន និងបានស្នើសុំព័ត៌មានផ្សេងៗពីសាធារណជន។

រហូតមកដល់ពេលនេះ មានការបាញ់ប្រហារទ្រង់ទ្រាយធំជាង ៤០០ករណីនៅទូទាំងសហរដ្ឋអាមេរិក ក្នុងឆ្នាំនេះ បើយោងតាមទីភ្នាក់ងារតាមដានហិង្សាដោយកាំភ្លើង (Gun Violence Archive) ដែលកំណត់ការបាញ់ប្រហារទ្រង់ទ្រាយធំ ថាជាឧបទ្ទវហេតុដែលមនុស្ស ៤នាក់ ឬច្រើននាក់រងរបួស ឬស្លាប់៕