យោងតាមសារអេឡិចត្រូនិក (អ៊ីមែល) របស់រដ្ឋាភិបាលដែលបានផ្ញើទៅកាន់អតីតនាយកប្រតិបត្តិម្នាក់របស់ក្រុមហ៊ុន ណេតហ្វ្លិច (Netflix) បានឱ្យដឹងថា ឥណ្ឌា កំពុងស៊ើបអង្កេតលើការអនុវត្តអាជីវកម្មនៃប្រតិបត្តិការក្នុងស្រុករបស់ក្រុមហ៊ុនភាពយន្តខ្នាតយក្ស Netflix របស់សហរដ្ឋអាមេរិក រួមទាំងការចោទប្រកាន់ពីបទបំពានទិដ្ឋាការ និងរើសអើងពូជសាសន៍។

ព័ត៌មានលម្អិតនៃការស៊ើបអង្កេតរបស់ឥណ្ឌា ត្រូវបានដាក់បញ្ចូលក្នុងអ៊ីមែលកាលពីថ្ងៃទី២០ ខែកក្កដា ដែលត្រូវបានពិនិត្យដោយសារព័ត៌មានរ៉យទ័រ ពីមន្ត្រីក្រសួងមហាផ្ទៃឥណ្ឌាទៅកាន់អតីតនាយកផ្នែកធុរកិច្ច និងច្បាប់របស់ Netflix ប្រចាំប្រទេសឥណ្ឌា លោកស្រី ណានឌីនី មេតា (Nandini Mehta) ដែលបានចាកចេញពីក្រុមហ៊ុនក្នុងឆ្នាំ២០២០។

មន្ត្រីឥណ្ឌា លោក ឌីផាក យ៉ាដាវ (Deepak Yadav) មកពីការិយាល័យចុះឈ្មោះតំបន់ជនបរទេស (FRRO) នៃក្រសួងការបរទេសក្នុងទីក្រុងញូវដេលី បានសរសេរថា «នេះទាក់ទងនឹងការបំពានទិដ្ឋាការ និងពន្ធទាក់ទងនឹងការអនុវត្តអាជីវកម្មរបស់ Netflix នៅឥណ្ឌា»។

នៅក្នុងសេចក្តីថ្លែងការណ៍តាមអ៊ីមែល លោកស្រី Mehta បាននិយាយថាខ្លួនកំពុងបន្តបណ្ដឹងនៅអាមេរិកប្រឆាំងនឹងក្រុមហ៊ុន Netflix សម្រាប់ការចោទប្រកាន់ពីការបញ្ចប់កិច្ចសន្យាការងារដោយមិនត្រឹមត្រូវ ក៏ដូចជាការរើសអើងជាតិសាសន៍ និងយេនឌ័រ ខណៈក្រុមហ៊ុនបានបដិសេធ។

អ្នកនាំពាក្យ Netflix បាននិយាយថា ក្រុមហ៊ុន «មិនបានដឹងពីការស៊ើបអង្កេតរបស់រដ្ឋាភិបាលឥណ្ឌានោះទេ»៕