បុគ្គលិកផ្នែកបដិសណ្ឋារកិច្ចរាប់ពាន់នាក់ បានចេញធ្វើកូដកម្មកាលពីថ្ងៃអាទិត្យ (២២ កញ្ញា) នៅទីក្រុងសាន់ហ្វ្រាន់ស៊ីស្កូ (San Francisco) របស់សហរដ្ឋអាមេរិក ដោយទាមទារប្រាក់ឈ្នួលកាន់តែប្រសើរ ការសម្រាលបន្ទុកការងារ និងតវ៉ាប្រឆាំងការកាត់បន្ថយបុគ្គលិកអំឡុងពេលជំងឺរាតត្បាតកូវីដ១៩។

បុគ្គលិកមកពីសណ្ឋាគារដូចជា ហ៊ីលតុន (Hilton Union Square), ផាលេស (Palace Hotel), វេសស្ទីន (Westin St. Francis) និង ហ្រ្គែន ហ៊ីយ៉ាត់ (Grand Hyatt) បានចូលរួមកូដកម្ម ដោយលើកឡើងពីការកាត់បន្ថយចំនួន ៥០% នៃកម្លាំងពលកម្ម ដែលនាំឱ្យមានបន្ទុកការងារកាន់តែធ្ងន់។

យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា ការតវ៉ារយៈពេល ២៤ម៉ោងនោះមានបុគ្គលិកចូលរួមប្រហែល ១.៥០០នាក់។ បុគ្គលិកជាច្រើនបានចែករំលែកបទពិសោធន៍នៃការបង្កើនភារកិច្ច និងបន្ទុកការងារដ៏ឈឺចាប់ ដោយពុំមានសំណងសមរម្យ និងប្តេជ្ញាតស៊ូដើម្បីទទួលបានលក្ខខណ្ឌការងារប្រសើរឡើង។

ការតវ៉ានៅទីក្រុងសាន់ហ្វ្រាន់ស៊ីស្កូ នេះកើតឡើងស្របពេលមានកូដកម្មជាច្រើនផ្សេងទៀតនៅទូទាំងប្រទេស។ បុគ្គលិកសណ្ឋាគាររាប់ពាន់នាក់កំពុងធ្វើកូដកម្មនៅសណ្ឋាគារ ហ៊ីលតុន (Hilton), ហ៊ីយ៉ាត់ (Hyatt), ម៉ារៀត (Marriott) និង អូមនី (Omni) ក្នុងគោលដៅចំនួន ១២ទីតាំង នៅទូទាំងសហរដ្ឋអាមេរិក។ បុគ្គលិកជាង ១០.០០០នាក់កំពុងធ្វើកូដកម្មនៅទីក្រុងដូចជា បាល់ទីម័រ (Baltimore), បូស្តុន (Boston), ហូណូលូលូ (Honolulu), សាហូសេ (San Jose), ស៊ីអាថល (Seattle), អូកលែន (Oakland) និងទីក្រុងផ្សេងទៀតទូទាំងប្រទេស៕