មន្ត្រីសន្តិសុខអ៊ីរ៉ង់ជាន់ខ្ពស់ ២រូប បានប្រាប់សារព័ត៌មាន Reuters ថា អង្គភាពឆ្មាំបដិវត្តន៍ឥស្សរជនរបស់អ៊ីរ៉ង់ (IRGC) បានបញ្ជាឲ្យសមាជិកទាំងអស់របស់ខ្លួនបញ្ឈប់ការប្រើប្រាស់ឧបករណ៍ទំនាក់ទំនងណាមួយ បន្ទាប់ពីម៉ាស៊ីនផ្ញើសា Pager និងវិទ្យុទាក់ទង Walkie-Talkies ដែលត្រូវបានប្រើប្រាស់ដោយសម្ព័ន្ធមិត្តរបស់ខ្លួន គឺក្រុមហេសបូឡា នៅប្រទេសលីបង់ បានផ្ទុះនៅក្នុងការវាយប្រហារ ដែលបណ្ដាលឲ្យអ្នកបាត់បង់ជីវិត កាលពីសប្តាហ៍មុន។

មន្ត្រីសន្តិសុខម្នាក់ បាននិយាយថា ប្រតិបត្តិការទ្រង់ទ្រាយធំមួយ កំពុងដំណើរការដោយ IRGC ដើម្បីត្រួតពិនិត្យឧបករណ៍ទាំងអស់ ដោយមិនត្រឹមតែឧបករណ៍ទំនាក់ទំនងប៉ុណ្ណោះទេ។ មន្ត្រីរូបនោះបានបញ្ជាក់ថា ឧបករណ៍ទាំងនេះភាគច្រើនផលិតនៅក្នុងស្រុក ឬនាំចូលពីប្រទេសចិន និងរុស្ស៊ី។

អ៊ីរ៉ង់មានការព្រួយបារម្ភអំពីការជ្រៀតចូលដោយភ្នាក់ងារអ៊ីស្រាអែល ក្នុងនោះរួមទាំងជនជាតិអ៊ីរ៉ង់ ពាក់ព័ន្ធនឹងបញ្ជីប្រាក់បៀវត្សរ៍របស់អ៊ីស្រាអែលផងដែរ ហើយការស៊ើបអង្កេតយ៉ាងហ្មត់ចត់លើបុគ្គលិកនានា បានចាប់ផ្តើមរួចហើយ ដោយបានកំណត់គោលដៅលើសមាជិកថ្នាក់កណ្តាល និងជាន់ខ្ពស់របស់ IRGC។ នេះបើតាមការឲ្យដឹងបន្ថែមរបស់មន្ត្រីរូបនោះ ដែលបាននិយាយក្នុងលក្ខខណ្ឌមិនបញ្ចេញឈ្មោះ ដោយសារភាពរសើបនៃបញ្ហានេះ។ 

យ៉ាងណាក្ដី ទាំងក្រសួងការបរទេស ការពារជាតិ និងក្រសួងមហាផ្ទៃរបស់អ៊ីរ៉ង់ មិនបានឆ្លើយតបភ្លាមៗនោះឡើយ សម្រាប់ការសុំការអត្ថាធិប្បាយពីសារព័ត៌មាន Reuters ពាក់ព័ន្ថនឹងការលើកឡើងនេះ។ 

គួរបញ្ជាក់ថា ក្នុងការវាយប្រហារដែលមានការសម្របសម្រួល ឧបករណ៍ផ្ញើសារ Pager បានផ្ទុះ កាលពីថ្ងៃអង្គារដើមសប្ដាហ៍កន្លងទៅ នៅទូទាំងបន្ទាយរបស់ក្រុមហេសបូឡា។ ហើយមួយថ្ងៃបន្ទាប់ វិទ្យុទាក់ទង Walkie-Talkies របស់ក្រុមហេសបូឡា រាប់រយបានផ្ទុះ។ ការវាយប្រហារនេះ បានសម្លាប់មនុស្ស ៣៩នាក់ ខណៈជាង ៣.០០០នាក់ បានរងរបួស។ លីបង់ និងហេសបូឡា និយាយថា អ៊ីស្រាអែលជាអ្នកនៅពីក្រោយការវាយប្រហារនេះ។ ចំណែកអ៊ីស្រាអែលទាំងមិនបានបដិសេធ និងមិនបានបញ្ជាក់ពីការពាក់ព័ន្ធដែរ៕