កូរ៉េខាងត្បូង៖ កូរ៉េខាងត្បូងកាលពីថ្ងៃអាទិត្យ (២៦ កញ្ញា) បានជំរុញឱ្យកូរ៉េខាងជើងតភ្ជាប់ឡើងវិញនូវខ្សែទូរស័ព្ទទំនាក់ទំនងដែលគ្មានសកម្មភាព មួយថ្ងៃបន្ទាប់ពីកូរ៉េខាងជើងបានស្នើជាថ្មីម្ដងទៀតឱ្យបើកកិច្ចចរចាតាមលក្ខខណ្ឌ។
កូរ៉េខាងជើងអាចនឹងស្វែងរកការដកសម្បទានប្រហែល ២សប្តាហ៍បន្ទាប់ពីខ្លួនបានបង្កើនភាពតានតឹង តាមរយៈការសាកល្បងមីស៊ីលលើកដំបូងរបស់ខ្លួនក្នុងរយៈពេល ៦ខែ។ កូរ៉េខាងជើងបានទាក់ទងទៅកូរ៉េខាងត្បូងពីរដងដោយនិយាយថា ខ្លួនបើកចំហដើម្បីចរចាប្រសិនបើលក្ខខណ្ឌនានាត្រូវបានគោរព។ លោកស្រី គីម យ៉ូជុង ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងលោក គីម ជុង អ៊ុន បាននិយាយកាលពីថ្ងៃសៅរ៍ថា ប្រទេសកូរ៉េទាំងពីរអាចបោះជំហានឆ្ពោះទៅរកការផ្សះផ្សាជាតិ ប្រសិនបើកូរ៉េខាងត្បូងបោះបង់ចោល “គោលនយោបាយអរិភាព” និង “របៀបដោះស្រាយបន្លំភ្នែក”។
លោកស្រីមិនបានបញ្ជាក់លម្អិតអំពីជំហានជាក់លាក់ណាមួយ ដែលលោកស្រីចង់ឱ្យកូរ៉េខាងត្បូងអនុវត្តទេ។ ប៉ុន្តែក្រុមអ្នកជំនាញមួយចំនួនបាននិយាយថា កូរ៉េខាងជើងចង់ឱ្យកូរ៉េខាងត្បូងដើរតួក្នុងការឈ្នះការបន្ធូរបន្ថយទណ្ឌកម្មដែលដឹកនាំដោយអាមេរិក ការទទួលបានជំនួយ ឬការទទួលបានសម្បទានផ្សេងទៀត ដូចជាការទទួលស្គាល់ជាអន្តរជាតិថា ជារដ្ឋអាវុធនុយក្លេអ៊ែរជាដើម៕
អត្ថបទ៖ សុខមាន