អាជ្ញាធរស៊ុយអែត នៅថ្ងៃអង្គារ (ទី២៤ ខែកញ្ញា) នេះ បានប្រាប់ឲ្យដឹងថា អ៊ីរ៉ង់បានលួចចូលទៅក្នុងសេវាកម្មផ្ញើសារជាអក្សរ កាលពីឆ្នាំមុន ហើយបានផ្ញើសាររាប់ពាន់ដង ដើម្បីជំរុញឲ្យអ្នករស់នៅស៊ុយអែតសងសឹក ចំពោះអ្នកដុតគម្ពីរកូរ៉ាន។

ក្នុងឆ្នាំ 2023 បុគ្គលនៅក្នុងប្រទេសស៊ុយអែតជាច្រើនដង បានដុតសាស្ត្រាដ៏ពិសិដ្ឋរបស់អ្នកកាន់សាសនាអ៊ិស្លាមជាសាធារណៈ ដោយបានដុតបញ្ឆេះឲ្យមានកំហឹង នៅក្នុងពិភពជនមូស្លីម និងធ្វើឲ្យមានការភ័យខ្លាចកាន់តែខ្លាំងឡើងថា អាចមានការវាយប្រហារដោយពួកជីហាដ។

សេវាសន្តិសុខស៊ុយអែត បានឲ្យដឹងនៅក្នុងសេចក្តីថ្លែងការណ៍ថា៖ «នគរបាលសន្តិសុខអាចអះអាងបានថា ក្រុមប្រព័ន្ធប្រតិបត្តិការតាមប្រព័ន្ធអ៊ីនធឺណេត បានធ្វើសកម្មភាពតំណាងឲ្យឆ្មាំបដិវត្តន៍អ៊ីរ៉ង់ ដើម្បីអនុវត្តយុទ្ធនាការជះឥទ្ធិពល»។ អង្គភាពនេះបានបន្តទៀតថា៖ «ក្នុងចំណោមអ្វីៗជាច្រើនផ្សេងទៀត គោលបំណងនេះ គឺដើម្បីធ្វើយ៉ាងណាឲ្យគេយល់ថា ស៊ុយអែតជាប្រទេសរើសអើងអ្នកកាន់សាសនាអ៊ិស្លាម និងបង្កើតការបែកបាក់ ក្នុងសង្គម»។

ស៊ុយអែតកាលពីឆ្នាំមុនបានដំឡើងការព្រមានកម្រិតខ្ពស់ អំពីការមានអំពើភេរវកម្ម បន្ទាប់ពីមានហេតុការណ៍ដុតគម្ពីរកូរ៉ាន។ នៅក្នុងសេចក្តីថ្លែងការណ៍ដាច់ដោយឡែកមួយ អាជ្ញាធរអយ្យការស៊ុយអែត បាននិយាយថា ការស៊ើបអង្កេតបង្ហាញថា គឺជារដ្ឋអ៊ីរ៉ង់ តាមរយៈកងឆ្មាំបដិវត្តន៍អ៊ិស្លាមអ៊ីរ៉ង់ ដែលបានអនុវត្តប្រតិបត្តិការរំលោភទិន្នន័យ។

ទីភ្នាក់ងារស៊ុយអែត បានបញ្ជាក់ថា ខ្លួនបានកំណត់អត្តសញ្ញាណពួកក្រុមចោរព័ត៌មានវិទ្យាជាលក្ខណៈបុគ្គល ដែលអនុវត្តការរំលោភបំពាននេះ ប៉ុន្តែនឹងមិនមានការចោទប្រកាន់នោះទេ៕