គណៈកម្មាធិការកិច្ចការបរទេសរបស់សភាតំណាងរាស្រ្តអាមេរិក ដែលដឹកនាំដោយសមាជិកគណបក្សសាធារណរដ្ឋ កាលពីថ្ងៃអង្គារ (ទី២៤ ខែកញ្ញា) បានផ្តល់ជាអនុសាសន៍ថា រដ្ឋមន្ត្រីការបរទេស លោក Antony Blinken គួរត្រូវបានឃុំខ្លួនពីបទមើលងាយសភា ដោយសារមិនគោរពតាមដីកាស្វែងរកព័ត៌មានអំពីភាពវឹកវរឆ្នាំ២០២១ ជុំវិញការដកទ័ពរបស់សហរដ្ឋអាមេរិកចេញពីអាហ្វហ្គានីស្ថាន។

ក្រុមប្រឹក្សាបានបោះឆ្នោតគាំទ្រជាមួយនឹងសំឡេង ២៦-២៥ ចំពោះរបាយការណ៍របស់គណៈកម្មាធិការដែលផ្តល់អនុសាសន៍ថា សភារកឃើញថា លោក Blinken បង្ហាញនូវការមើលងាយ ដោយបដិសេធមិនអនុវត្តតាមដីការបស់កោះហៅរបស់សភា បន្ទាប់ពីលោកមិនបានបង្ហាញខ្លួន នៅក្នុងសវនាការ កាលពីព្រឹកថ្ងៃទី២៤ ខែកញ្ញា ដើម្បីឲ្យទៅបំភ្លឺពាក់ព័ន្ធនឹងការដកទ័ព។

ក្រសួងការបរទេសមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ជុំវិញការបោះឆ្នោតនេះ។

លោក Blinken ដែលកំពុងស្ថិតនៅទីក្រុងញូវយ៉ក ក្នុងសប្តាហ៍នេះ ដើម្បីចូលរួមមហាសន្និបាតអង្គការសហប្រជាជាតិ កាលពីថ្ងៃទី២២ ខែកញ្ញា បានឲ្យដឹងនៅក្នុងលិខិតមួយផ្ញើទៅកាន់ប្រធានគណៈកម្មាធិការ គឺលោក Michael McCaul តំណាងរាស្ត្រមកពីគណបក្សសាធារណរដ្ឋថា លោកបានព្យាយាមរៀបចំជាមួយគណៈកម្មាធិការ ជុំវិញថា តើនៅពេលណាដែលរូបលោកនឹងអាចមានវត្តមាន ដើម្បីផ្តល់សក្ខីកម្ម ហើយបានផ្តល់សាក្សីជំនួស៕