មន្ត្រីជាន់ខ្ពស់អាមេរិកម្នាក់បាននិយាយកាលពីថ្ងៃអង្គារ (២៤ កញ្ញា) ថា សហរដ្ឋអាមេរិក សង្ឃឹមថានឹងពិភាក្សាអំពីកិច្ចខិតខំប្រឹងប្រែងដើម្បីកាត់បន្ថយការរីករាលដាលនៃសារធាតុ ហ្វង់តានីល (Fentanyl) ជាមួយប្រទេសចិន នៅក្នុងកិច្ចប្រជុំកំពូល APEC ក្នុងខែវិច្ឆិកា ខាងមុខនេះ។

មន្ត្រីរូបនោះបានលើកឡើងបែបនេះបន្ទាប់ពីប្រធានាធិបតីសហរដ្ឋអាមេរិក លោក Joe Biden បានប្រកាសនៅក្នុងព្រឹត្តិការណ៍មួយនៅទីក្រុងញូវយ៉កថា ទិន្នន័យថ្មីបានបង្ហាញពីការធ្លាក់ចុះ ១០% ធៀបនឹងឆ្នាំមុន នៃការស្លាប់ក្នុងសហរដ្ឋអាមេរិក ដោយសារថ្នាំហ្វង់តានីល។

លោក Biden និងប្រធានាធិបតីចិន លោក Xi Jinping បានពិភាក្សាអំពីសារធាតុហ្វង់តានីលនេះនៅក្នុងកិច្ចប្រជុំកំពូលមួយនៅរដ្ឋ កាលីហ្វ័រនីញ៉ា (California) កាលពីខែវិច្ឆិកា ឆ្នាំមុន។ អាមេរិកចង់ឱ្យចិន ចាត់វិធានការបន្ថែមទៀតនៅក្នុងប្រទេសដើម្បីការពារការវិវត្តនៃសារធាតុគីមីដែលអាចផលិតជាហ្វង់តានីល ដែលជាមូលហេតុនាំមុខគេនៃការប្រើថ្នាំលើសកម្រិតនៅអាមេរិក។

នៅពេលត្រូវសាកសួរថា តើអាមេរិក និងចិន នឹងពិភាក្សាអំពីសារធាតុហ្វង់តានីលនៅក្នុងកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក APEC ក្នុងប្រទេសប៉េរូ នៅខែវិច្ឆិកានេះឬទេ មន្ត្រីរូបនេះបានឆ្លើយថា «យើងមានសុទិដ្ឋិនិយមយ៉ាងខ្លាំងដែលថានឹងមានបញ្ហានេះនៅក្នុងរបៀបវារៈ» ដោយបន្ថែមថាប្រទេសទាំងពីរបានមើលឃើញលទ្ធផលមួយចំនួនរួចមកហើយ៕