ក្រុមតស៊ូអ៊ីរ៉ាក់ បានយល់ព្រមចូលសមរភូមិដោយផ្ទាល់ ដើម្បីគាំទ្រក្រុមហេសបូឡា ក្នុងករណីមានប្រតិបត្តិការជើងគោករបស់កងទ័ពរបស់អ៊ីស្រាអែល នៅភាគខាងត្បូងប្រទេសលីបង់។

នៅក្នុងកិច្ចប្រជុំមួយដែលធ្វើឡើងដោយក្រុមតស៊ូអ៊ីរ៉ាក់ជាច្រើន នៅក្នុងទីក្រុងបាកដាដ ក្នុងរយៈពេលប៉ុន្មានម៉ោងកន្លងមកនេះ ទាក់ទងនឹងស្ថានភាពនៅក្នុងប្រទេសលីបង់ ក្រុមទាំងនេះ បានយល់ព្រមគាំទ្រក្រុមហេសបូឡា ក្នុងការប្រឈមមុខជាមួយក្រុមឈ្លានពានអ៊ីស្រាអែលទាក់ទងនឹងអាវុធ និងកងកម្លាំង។ ក្នុងពេលជាមួយគ្នានោះ ការវាយប្រហារដោយយានដ្រូន និងមីស៊ីលពីខាងក្នុងអ៊ីរ៉ាក់ និងស៊ីរី ឆ្ពោះទៅ គោលដៅនៅប៉ាឡេស្ទីនដែលគ្រប់គ្រងដោយអ៊ីស្រាអែល នឹងបន្តកាន់តែខ្លាំងឡើង។

សមាជិកដ៏លេចធ្លោម្នាក់នៃក្រុមតស៊ូឥស្លាមអ៊ីរ៉ាក់ បានប្រាប់សារព័ត៌មានកាតា «Al-Arabi Al-Jadeed» អំពីរឿងនេះ» នៅក្នុងកិច្ចប្រជុំនេះ ដែលមានរយៈពេលជាងពីរម៉ោង មេបញ្ជាការ និងក្រុមអ្នកតំណាងមកពីកងវរសេនាតូចរបស់ក្រុមហេសបូឡា ចលនាNojaba លោក Ansarullah al-wfia កងវរសេនាតូច Imam Ali និងកងវរសេនាតូច Seyyed al-Shohada មានវត្តមាន ហើយបានឈានដល់កិច្ចព្រមព្រៀង ដែលសំខាន់បំផុតនោះ គឺ«ការចូលទៅក្នុងសមរភូមិដោយផ្ទាល់ជាមួយក្រុមហេសបូឡា នៅប្រទេសលីបង់ ប្រឆាំងនឹងប្រតិបត្តិការជើងគោកដែលអាចកើតមានរបស់សត្រូវជ្វីហ្វនិយម»។

ដោយសង្កត់ធ្ងន់ថា ប្រតិបត្តិការមីស៊ីល យានដ្រូន និងកាំភ្លើងធំពីប្រទេសអ៊ីរ៉ាក់ ឬស៊ីរី នឹងបន្តជាផ្នែកមួយនៃប្រតិបត្តិការគាំទ្រនោះ ប្រភពដដែល បានបញ្ជាក់ថា៖«មេបញ្ជាការក្រុមតស៊ូរបស់អ៊ីរ៉ាក់ បានទាក់ទងជាមួយក្រុមហេសបូឡានៅប្រទេសលីបង់ក្នុងរយៈពេលប៉ុន្មានម៉ោងកន្លងមកនេះ ដើម្បីសម្របសម្រួលដល់លទ្ធភាពផ្លាស់ប្តូរផ្សេងៗ។