រដ្ឋមន្ត្រីការបរទេសអាមេរិក លោក អង់តូនី ប៊ីនខិន ( Antony Blinken) កាលពីថ្ងៃអង្គារ បានធ្វើការអំពាវនាវយ៉ាងយកចិត្តទុកដាក់ចំពោះកិច្ចខិតខំប្រឹងប្រែងអន្តរជាតិ ដើម្បីដោះស្រាយកិច្ចសហប្រតិបត្តិការយោធារបស់រុស្ស៊ី ជាមួយប្រទេសកូរ៉េខាងជើង និងអ៊ីរ៉ង់ ដោយនិយាយថា ខ្លួនកំពុងជួយទីក្រុងមូស្គូបង្កការសម្លាប់រង្គាល នៅអ៊ុយក្រែន ហើយនឹងរារាំងសន្តិសុខសកល។

លោក ប៊ីនខិន បានធ្វើការអត្ថាធិប្បាយក្នុងអំឡុងពេលកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីអ៊ុយក្រែន នៅទីស្នាក់ការកណ្តាលរបស់អង្គការសហប្រជាជាតិ នៅទីក្រុងញូវយ៉ក ជាកន្លែងដែលប្រធានាធិបតីអ៊ុយក្រែនលោក វ្ល៉ូឌីមី ហ្សេឡិនស្គី (Volodymyr Zelenskyy) រដ្ឋមន្ត្រីការបរទេសកូរ៉េខាងត្បូងលោក ចូ ថេ យុល (Cho Tae-yul) និងមន្ត្រីជាន់ខ្ពស់ផ្សេងទៀត មានវត្តមាន។

លោកបានថ្លែងថា៖«ការគាំទ្រពីទីក្រុងតេអេរ៉ង់ និងក្រុងព្យុងយ៉ាង កំពុងជួយលោក ពូទីន ធ្វើឃាត រងទុក្ខវេទនា និងការបំផ្លិចបំផ្លាញលើបុរស ស្ត្រី និងកុមារអ៊ុយក្រែនស្លូតត្រង់ កម្ទេចអគារផ្ទះល្វែងរបស់អ៊ុយក្រែន ឃ្លាំងស្តុកគ្រាប់ធញ្ញជាតិ និងកំពង់ផែ បំផ្លាញរោងចក្រថាមពល កម្តៅ និងឧស្ម័នធម្មជាតិរបស់អ៊ុយក្រែន ខណៈដែលសីតុណ្ហភាពត្រជាក់ កំពុងកើតឡើង។  

លោករដ្ឋមន្ត្រី បានសម្តែងការព្រួយបារម្ភថា ប្រទេសរុស្ស៊ី កាន់តែច្រើនពឹងផ្អែកលើការគាំទ្រពីកូរ៉េខាងជើង និងអ៊ីរ៉ង់ ហើយអ៊ីរ៉ង់ និងកូរ៉េខាងជើង«ទាញយក»ផលប្រយោជន៍កាន់តែច្រើន ជាថ្នូរនឹងការត្រឡប់មក   វិញ។