ប្រជាពលរដ្ឋគុយបា បានចាត់វិធានការ ដើម្បីការពារទ្រព្យសម្បត្តិរបស់ពួកគេ មុនការមកដល់របស់ព្យុះទីហ្វុង Helene ដែលគេរំពឹងថា នឹងបង្កឲ្យកើតមានបំណាក់ដី និងទឹកជំនន់នៅប្រទេសកោះក្នុងតំបន់ការ៉ាអ៊ីបមួយនេះ ។

 លោក Ivan Espinosa គឺជាអ្នកស្រុកមួយរូបរស់នៅក្នុងទីក្រុង Guanimar និយាយថា បម្រែបម្រួលអាកាសធាតុ បាននាំយកព្យុះស៊ីក្លូនដ៏ខ្លាំងក្លា មិនដូចពួកយើងធ្លាប់ឃើញកាលពីមុននោះទេ ។ 

 ចំណែកឯកអ្នកស្រី Melvis Donar គឺជាពលរដ្ឋមួយរូបទៀត និយាយដែរថា អ្នកស្រីមានការព្រួយបារម្ភជាខ្លាំងចំពោះការខូចខាតទ្រព្យសម្បត្តិផ្ទាល់ខ្លួនរបស់អ្នកស្រី ។

 មន្ទីរព្យុះសង្ឃរាជាតិសហរដ្ឋអាមេរិកដែលមានមូលដ្ឋាននៅទីក្រុង Miami បាននិយាយនៅក្នុងសេចក្តីជូនដំណឹងចុងក្រោយរបស់ខ្លួនកាលពីថ្ងៃអង្គារថា ព្យុះ Helene កំពុងបង្កើនកម្លាំងរបស់វានៅចម្ងាយ ២៧៧គ.ម ភាគខាងត្បូងតំបន់ជ្រោយភាគខាងលិចប្រទេសគុយបា ស្របពេលដែលវាបោកបក់ឆ្ពោះទៅទិសពាយ័ព្យ ជាមួយនឹងល្បឿនខ្យល់បក់ ៧២គ.ម ក្នុង ១ម៉ោង ។

 ភ្លៀងចាប់ផ្តើមបង្អុរចុះនៅតំបន់ភាគខាងលិចប្រទេសគុយបា កាលពីព្រឹកថ្ងៃអង្គារ បង្ខំឲ្យក្រុមអាជ្ញាធរបិទសាលារៀន កំពង់ផែ និងប្រាប់ឲ្យទូកនេសាទឡើងកំពង់ ។

 ការឃ្លាំមើលព្យុះ និងការព្រមានពីព្យុះត្រូពិក បានចូលជាធរមាននៅទូទាំងតំបន់ភាគខាងលិចប្រទេសគុយបា ខណៈទីក្រុងឡាហាវ៉ាន់ ត្រូវបានគេរំពឹងថា នឹងមើលឃើញភ្លៀងធ្លាក់ខ្លាំង ៕