បាល់ទាត់៖ ​ខ្សែប្រយុទ្ធ​វ័យក្មេង​ក្រុម​កងយោធពល​ខេមរភូមិន្ទ ជឿ ណា​ចា បានបង្ហាញ​អារម្មណ៍រំ​ភើ​ប​រីករាយ​ជាខ្លាំង ក្រោយ​ត្រូវបាន​កោះហៅ​ចូលរួម​ក្រុម​ជម្រើសជាតិ​កម្ពុជា ដើម្បី​ត្រៀម​ការប្រកួត​ជម្រុះ​ពានរង្វាន់ AFC Asian Cup China 2023 Qualifiers (Play-Off) នៅ​ប្រទេស​បា​រ៉ែ​ន និង​ពានរង្វាន់ AFC U23 Asian Cup Uzbekistan 2022-Qualifiers នៅ​ប្រទេស​ជប៉ុននា​ខែតុលា​ខាងមុខ។

​

​ណា​ចា បាន​បញ្ជាក់ថា ខ្លួន​មិន​នឹកស្មានថា មានឱកាស​ជាប់​ជម្រើសជាតិ​នោះទេ ទោះបី​នេះ​ជា​ក្ដី​ស្រ​ម៉ៃ​ដ៏​ធំ​របស់ខ្លួន​ក៏ដោយ ព្រោះ​រូបគេ​បារម្ភ​ពី​កាយសម្បទា។ តែ​យ៉ាងណា​ក្រោយ​ទទួលបាន​សេចក្ដីទុកចិត្ត​ពី​គ្រូបង្វឹក​លោក Ryu Hirose ក៏ដូចជា​អ្នកចាត់ការ​ទូទៅ​ក្រុម​ជម្រើសជាតិ​កម្ពុជា ណា​ចា ប្ដេជ្ញា​នឹង​ខំប្រឹង​ទ្វេដងដើម្បី​មានឱកាស​លេង ឬ​ឈានទៅ​បង្ហាញខ្លួន​ក្នុង​ជម្រើស ១១​នាក់​ដំបូង។​ ​គួរ​ដឹងថា ជឿន ណា​ចា គឺជា​កីឡាករ​វ័យក្មេង​ម្នាក់ក្នុងចំណោម​កីឡាករ​វ័យក្មេង​ជាច្រើន ដែល​ត្រូវបាន​កោះ​ហៅចូល​ក្រុម​ជម្រើសជាតិដើម្បី​ត្រៀម​ការប្រកួត​ពានរង្វាន់​ទ្វីបអាស៊ី​ទាំង ២ រួមមាន​ការប្រកួត​ជម្រុះ​ពានរង្វាន់ AFC Asian Cup China 2023 ដែល​ក្រុម​គោព្រៃ​កម្ពុជានឹងត្រូវ​ជួប​ក្រុម​កោះ​ហ្គាំ នៅលើ​ទឹកដី​កណ្ដាលនា​ប្រទេស​បា​រ៉ែ​ន​ទាំង ២​ជើងនា​ថ្ងៃទី​០៩ និង​ថ្ងៃទី​១២ ខែតុលា។ ចំណែក​ការប្រកួត AFC U23 Asian Cup Uzbekistan 2022-Qualifiers ក្រុម U23 កម្ពុជានឹងត្រូវ​ប្រកួត​ជម្រុះ​ក្នុង​ពូ​ល K ដោយ​ត្រូវ​ជួប​ហុងកុងនា​ថ្ងៃទី​២៣-​តុលា និង​ជួប​ម្ចាស់ផ្ទះ​ជប៉ុននា​ថ្ងៃទី​២៦-​តុលា ឆ្នាំ​២០២១៕

​អត្ថបទ៖ លី ឈុន​ឡា