សារព័ត៌មាន យ៉ូមីអ៊ូរី (Yomiuri) បានរាយការណ៍ដោយដកស្រង់ប្រភពជាច្រើនរបស់រដ្ឋាភិបាលថា កងកម្លាំងស្វ័យការពាររបស់ប្រទេសជប៉ុន SDF បានល្បាតច្រកសមុទ្រតៃវ៉ាន់កាលពីថ្ងៃពុធ (២៥ កញ្ញា) ជាលើកដំបូងក្នុងការប៉ុនប៉ងផ្ញើសារទៅកាន់ប្រទេសចិន។

សារព័ត៌មានជប៉ុនមួយនេះបាននិយាយនៅថ្ងៃព្រហស្បតិ៍ (២៦ កញ្ញា) នេះថា នាវាពិឃាតរបស់កម្លាំងស្វ័យការពារជប៉ុន SDF ឈ្មោះថា សាហ្សាណាមិ (Sazanami) បានចូលដែនទឹកពីសមុទ្រចិនខាងកើតកាលពីព្រឹកថ្ងៃពុធ ដោយចំណាយពេលជាង ១០ម៉ោង ធ្វើដំណើរឆ្ពោះទៅភាគខាងត្បូងដើម្បីបញ្ចប់ការឆ្លងកាត់។

ការឆ្លងកាត់នេះត្រូវបានធ្វើឡើងរួមគ្នាជាមួយនាវាកងទ័ពជើងទឹកមកពីប្រទេសអូស្ត្រាលី និងនូវែលសេឡង់ ដោយបន្ថែមថា កងទ័ពជើងទឹករបស់ប្រទេសទាំងបីគ្រោងនឹងធ្វើសមយុទ្ធរួមគ្នានៅសមុទ្រចិនខាងត្បូង ដែលចាប់ផ្តើមនៅថ្ងៃព្រហស្បតិ៍នេះ។

អ្នកនាំពាក្យរដ្ឋាភិបាលជប៉ុន លោក យ៉ូស៊ីម៉ាសា ហាយ៉ាស៊ិ (Yoshimasa Hayashi) បានបដិសេធមិនធ្វើអត្ថាធិប្បាយលើរបាយការណ៍នេះទេ ខណៈសម្តែងការព្រួយបារម្ភពីកំណើនសកម្មភាពយោធារបស់ចិននៅក្នុងតំបន់។ សារព័ត៌មាន Yomiuri និយាយថា កងកម្លាំង SDF របស់ជប៉ុន រហូតមកទល់ពេលនេះបានជៀសវាងការឆ្លងកាត់ច្រកសមុទ្រតៃវ៉ាន់ ដើម្បីកុំឱ្យទីក្រុងប៉េកាំង ខឹងសម្បារ។

គួរបញ្ជាក់ថា កងទ័ពជើងទឹកសហរដ្ឋអាមេរិក និងប្រទេសដទៃទៀតឆ្លងកាត់ច្រកសមុទ្រតៃវ៉ាន់ជាទៀងទាត់ ដើម្បីទាមទារ "សេរីភាពនៃនាវាចរណ៍"។ កងទ័ពជើងទឹកអាល្លឺម៉ង់ ក៏បានធ្វើការឆ្លងកាត់ក្នុងខែនេះជាលើកដំបូងផងដែរក្នុងរយៈពេលពីរទសវត្សរ៍ ដែលបង្ហាញពីការតាំងចិត្តរបស់ទីក្រុងប៊ែរឡាំង ក្នុងការឈរជាមួយសម្ព័ន្ធមិត្តលោកខាងលិច៕