​បាល់ទាត់៖ ​ក្រុម​ដែល​ប្រមូលផ្តុំ​ដោយ​តារាបាល់ទាត់​ល្បី Paris Saint Germain នឹងត្រូវ​ទទួល​ក្រុម​ភ្ញៀវ​អង់គ្លេស Manchester City រាត្រី​នេះ​នៅ​ក្របខណ្ឌ UEFA Champions League ជុំ​ទី២ ក្នុង​ពូ​ល A​។

​​ក្រុម​របស់លោក Mauricio Pochettino នៅ​មិនទាន់​ច្បាស់​នៅឡើយ​ថា Lionel Messi នឹង​អាច​ចូល​លេង​ប្រកួតយប់​នេះ​បាន​រឺ​អត់ បន្ទាប់ពី​អវត្តមាន​ពីរ​ប្រកួត​មកហើយ​ដោយសារ​របួស​ជង្គង់​បន្តិចបន្តួច​។ ​​អ្នកចាត់ការ​សញ្ជាតិ​អា​ហ្ស​ង់​ទីន​រូបនេះហាក់​មិនសូវមាន​ទំនាក់ទំនង​ល្អជា​មួយ Messi ឡើយ បន្ទាប់ពី​គេ​ឃើញ Messi មិន​សប្បាយចិត្ត​នៅពេល​ផ្លាស់ប្តូរ​ចេញ​ពេល​យកឈ្នះ Lyon ២-១ នោះ​។ Messi នៅ​មិនទាន់​រកបាន​គ្រាប់​បាល់​ឡើយ​តាំងពី​ផ្ទេរ​មកកាន់ PSG ខណៈ​គ្រាប់​បាល់​ចុងក្រោយ​បំផុត​របស់គេ​នៅ UCL នោះ​គឺ​តាំងពី​វគ្គ ១៦ក្រុម​ចុងក្រោយ​រដូវ​កាល​មុន​ជាមួយ Barcelona ស៊ុត​បញ្ចូល​ទី PSG នេះ​តែម្តង​។

​​ជុំវិញ​អ្នកចាំទី​វិញ​អតីត​អ្នកចាត់ការ Spurs លោក Pochettino ក៏​ស្មុគស្មាញ​ពី​ជំរើស​អ្នកចាំទី​ផងដែរ​រវាង​ជើងចាស់ Kaylor Navas និង Gianluigi Donnarumma​។​ ​​Navas អាចនិយាយបាន​ថា ​ជា​អ្នកចាំទី​កំពូល​ម្នាក់​នៅលើ​លោកតា​មរយៈ​បទពិសោធន៍​របស់គេ តែ​កីឡាករ​ចំនូល​ថ្មី ថ្វីបើ​វ័យក្មេង Donnarumma ទើបតែ​ជួយ​ក្រុម​ជំរើសជាតិ​អ៊ីតាលី​ឈ្នះ​ជើងឯក Euro ២០២០​។ ​​Navas បាន​ចូល​លេង​ពីរ​ប្រកួត​ចុងក្រោយ និង​កំពុងមាន​ទំរង់​លេង​ល្អ​តែ Donnarumma មកដល់​ទីនេះ​មិនមែនជា​អ្នកចាំទី​ដៃ​ទី២ ឡើយ​៕

​អត្ថបទ​៖​នាង សុភា​វុ​ធ