ក្រសួងការពារជាតិចិន នៅថ្ងៃព្រហស្បតិ៍ (ទី២៦ ខែកញ្ញា) នេះ បានប្រាប់ថា សមយុទ្ធយោធារបស់ខ្លួន ទាំងនៅក្នុងតំបន់ដែនអាកាស និងដែនសមុទ្រ ជុំវិញកោះតៃវ៉ាន់ គឺស្របច្បាប់ ហើយថា ខ្លួននឹងបន្តពង្រឹងការត្រៀមខ្លួនប្រយុទ្ធ និងរៀបចំសមយុទ្ធបែបនេះ។

ស្ថាប័នការពារជាតិរបស់កោះតៃវ៉ាន់ បានបង្កើនការព្រមាន នៅថ្ងៃព្រហស្បតិ៍នេះ អំពីការកើនឡើងជាថ្មីនូវសកម្មភាពយោធារបស់ប្រទេសចិន នៅជុំវិញកោះ និងអំពីសមយុទ្ធបាញ់គ្រាប់ពិត ដោយចោទប្រកាន់ទីក្រុងប៉េកាំងថា ធ្វើឲ្យមានអស្ថិរភាពនយោបាយ ដែលបង្កជាបញ្ហាប្រឈមធ្ងន់ធ្ងរដល់អ្នកជិតខាងរបស់ខ្លួន។

កោះដែលគ្រប់គ្រងដោយលទ្ធិប្រជាធិបតេយ្យ គឺតៃវ៉ាន់ ដែលទីក្រុងប៉េកាំងចាត់ទុកជាដែនដីរបស់ខ្លួន បានរិះគន់ដល់ការបង្កើនកាន់តែខ្លាំងឡើងៗនូវសកម្មភាពយោធារបស់ចិន ក្នុងរយៈពេល ៥ឆ្នាំកន្លងមកនេះ។ រដ្ឋបាលកោះតៃវ៉ាន់ ច្រានចោលការអះអាងអធិបតេយ្យភាពរបស់ប្រទេសចិន។

ហើយនៅថ្ងៃព្រហស្បតិ៍ ស្ថាប័នការពារជាតិកោះតៃវ៉ាន់ បានប្រាប់ឲ្យដឹងថា ខ្លួនបានឃើញជាថ្ងៃទី២ នៃសកម្មភាពយោធាទ្រង់ទ្រាយធំរបស់ចិន នៅក្បែរកោះ ដោយមានយន្តហោះចំនួន ២៩គ្រឿង ចូលរួមក្នុង «ការល្បាតត្រៀមប្រយុទ្ធរួមគ្នា» ជាមួយនាវាចម្បាំងចិន៕