ក្រុមឧទ្ទាមផ្តាច់ខ្លួន បានបដិសេធន៍ចោលការផ្តល់ជូនសន្តិភាពពីរបបសឹកសហភាពមីយ៉ាន់ម៉ាដែលខកចិត្តចំពោះការចាញ់សមរភូមិ និងការរត់ចោលជួរនៅក្នុងសង្រ្គាមស៊ីវិលដែលអូសបន្លាយពេលជាង ៣ឆ្នាំមកហើយ ។

គួរឲ្យដឹងថា កាលពីថ្ងៃព្រហស្បតិ៍ម្សិលមិញ យោធាសហភាពមីយ៉ាន់ម៉ា បានជំរុញឲ្យគូប្រជែងប្រដាប់អាវុធរបស់ខ្លួនបោះបង់ចោលនូវអ្វីដែលពួកគេហៅថា អំពើភេរវកម្ម ហើយចូលរួមក្នុងដំណើរការនយោបាយនៅក្នុងការបោះឆ្នោតសកលនៅឆ្នាំក្រោយ នៅក្នុងការផ្សព្វផ្សាយដែលមិននឹកស្មានដល់មួយដល់សត្រូវខ្លួន ដែលបន្ទាប់មកត្រូវបានបដិសេធយ៉ាងឆាប់រហ័ស ។ 

សហភាពមីយ៉ាន់ម៉ា បានជាប់គាំងក្នុងសង្គ្រាមស៊ីវិល ដោយរបបសឹកកំពុងប្រយុទ្ធនៅលើសមរភូមិមុខជាច្រើនប្រឆាំងនឹងចលនាតស៊ូប្រដាប់អាវុធ ដែលជាកងកម្លាំងការពារប្រជាជន (PDF) គឺជាសម្ព័ន្ធមិត្តជាមួយក្រុមឧទ្ទាមជនជាតិភាគតិចជាច្រើនទៀត មានប្រវត្តិជូរចត់ជាមួយយោធា ។ 

នេះគឺជាសកម្មភាពឃោសនាលើកដំបូងរបស់របបផ្តាច់ការមួយនេះ ចាប់តាំងពីពួកគេរឹបអូសអំណាចកាលពីឆ្នាំ ២០២១ ។ វាបានកើតមានឡើងផងដែរ ក្រោយបទឈប់បាញ់សម្របសម្រួលដោយចិន នៅរដ្ឋភាគខាងជើង Shan បានដួលរលំ ។

រដ្ឋាភិបាលរួបរួមជាតិនិរទេស(NUG) បាននិយាយថា ការផ្តល់ជូននេះ គ្មានតម្លៃនឹងពិចារណានោះទេ ហើយរបបសឹកគ្មានអំណាចក្នុងការរៀបចំការបោះឆ្នោតនោះដែរ ។

សេចក្តីរាយការណ៍មួយចំនួន បានឲ្យដឹងថា បច្ចុប្បន្នរបបសឹកមីយ៉ាន់ម៉ា គ្រប់គ្រងទឹកដីមីយ៉ាន់ម៉ាតិចជាងពាក់កណ្តាលប៉ុណ្ណោះ ។

កាលពីខែមិថុនាកន្លងទៅ សម្ព័ន្ធមិត្តនៃកងទ័ពជនជាតិភាគតិចចំនួន ៣ បានបើកការវាយប្រហារជាថ្មីលើយោធាមីយ៉ាន់ម៉ា ដោយរឹបអូសបានដែនដីនៅតាមផ្លូវហាយវ៉េសំខាន់មួយកន្លែងនៅជាប់ខេត្ត Yunnan របស់ចិន ដែលមានព្រំដែនជាប់ជាមួយមីយ៉ាន់ម៉ា ៕