ទីភ្នាក់ងារជនភៀសខ្លួនរបស់អង្គការសហប្រជាជាតិ(UNHCR) បាននិយាយកាលពីថ្ងៃសុក្រ ទី២៧ ខែកញ្ញា ថា មនុស្សជាង ៣០.០០០ នាក់ ភាគច្រើនជាជនជាតិស៊ីរី បានឆ្លងចូលទៅក្នុងប្រទេសស៊ីរីពីប្រទេសលីបង់ ក្នុងរយៈពេល ៧២ ម៉ោងចុងក្រោយនេះ ខណៈដែលជម្លោះរវាងអ៊ីស្រាអែល និងក្រុមហេសបូឡា កាន់តែខ្លាំងឡើង។ លោក Gonzalo Vargas Llosa តំណាងអង្គការ UNHCR ប្រចាំប្រទេសស៊ីរី បាននិយាយថា ប្រជាជនប្រហែល៨០% ដែលឆ្លងកាត់គឺជាជនជាតិស៊ីរី ហើយប្រហែល ២០% គឺជាជនជាតិលីបង់។

លោកបាននិយាយបន្តថា ប្រហែលពាក់កណ្តាលនៃចំនួននេះគឺជាកុមារ និងក្មេងជំទង់ ហើយបុរសកំពុងធ្វើការឆ្លងកាត់ក្នុងចំនួនតិចជាងស្ត្រី។ លោក Vargas Llosa និយាយនៅក្នុងសន្និសីទសារព័ត៌មាន នៅទីក្រុងហ្សឺណែវ ថា «ពួកគេកំពុងឆ្លងកាត់ពីប្រទេសដែលកំពុងមានសង្រ្គាមទៅកាន់ប្រទេសមួយដែលបានប្រឈមមុខរួចទៅហើយទៅនឹងវិបត្តិសង្គ្រាមអស់រយៈពេល១៣ឆ្នាំមកនេះ ដោយលោក ចាត់ទុកថា វាជាជម្រើសដ៏លំបាកបំផុត។ 

លោកបាននិយាយថា អង្គការ UNHCR បាននឹងកំពុងធ្វើការជាមួយរដ្ឋាភិបាល និងដៃគូរបស់ប្រទេសស៊ីរី ដើម្បីបង្កើនការទទួលយក និងដំណើរការសម្រាប់អ្នកដែលបានមកដល់ ហើយប្រទេសស៊ីរី កំពុងអនុញ្ញាតឱ្យប្រជាជនលីបង់ ចូលមកសម្រាប់ពេលវេលាមិនជាក់លាក់ ដរាបណាពួកគេមានឯកសារមួយចំនួនបង្ហាញឈ្មោះ របស់ពួកគេ។ ប្រទេសលីបង់ បានផ្តល់ទីស្នាក់អាស្រ័យដល់ប្រជាជនស៊ីរីប្រហែល១,៥លាននាក់ ដែលបានភៀសខ្លួនចេញពីសង្រ្គាមស៊ីវិល នៅក្នុងប្រទេសរបស់ពួកគេ។

រដ្ឋមន្ត្រីការបរទេសអ៊ីស្រាអែល បានច្រានចោលការអំពាវនាវជាសកលសម្រាប់បទឈប់បាញ់ជាមួយក្រុមហេសបូឡាគាំទ្រដោយអ៊ីរ៉ង់ ហើយបានបញ្ជាក់ពីការវាយប្រហារតាមអាកាស ដែលនៅក្នុងសប្តាហ៍នេះ ដែលបានបង្កើនការព្រួយបារម្ភពីសង្គ្រាមក្នុងតំបន់។