អ្នកស្លាប់ដោយសារព្យុះសង្ឃរាហេលេន(Helene) បានកើនឡើងជាង១០០ នាក់នៅទូទាំងភាគអាគ្នេយ៍សហរដ្ឋអាមេរិកកាលពីថ្ងៃអាទិត្យ ខណៈក្រុមអាជ្ញាធរបានប្រញាប់ប្រញាល់ទម្លាក់ការផ្គត់ផ្គង់តាមអាកាស និងស្តារផ្លូវថ្នល់ឡើងវិញ បន្ទាប់ពីមានភ្លៀងធ្លាក់ខ្លាំងបង្កឡើងដោយសារព្យុះដ៏មានឥទ្ធិពលនេះ និងបានធ្វើឱ្យមនុស្សជាប់ខ្លួនក្នុងទឹកជំនន់ និងគ្មានទីជម្រក។ 

ទូរទស្សន៍ CBS News បានបញ្ជាក់ថាព្យុះសង្ឈរា ហេលេន បានបណ្តាលឱ្យមនុស្សយ៉ាងហោចណាស់ ១០៥ នាក់បានស្លាប់ និងបានបង្កការបំផ្លិចបំផ្លាញយ៉ាងធ្ងន់ធ្ងរ និងកាត់ផ្តាច់ចរន្តអគ្គិសនីដល់មនុស្សរាប់លាននាក់។ អ្នកស្លាប់ចំនួន ៣០ នាក់ត្រូវបានរាយការណ៍នៅក្នុងស្រុកបាន់ខាំបេ             (Buncombe) ក្នុងរដ្ឋ ណស ខារ៉ូឡាយណា (North Carolina) ជារដ្ឋមួយដែលរងការវាយប្រហារខ្លាំងបំផុតពីព្យុះនេះ។  

ព្យុះនេះបានបោកបក់ក្នុងតំបន់ឆ្នេរ Big Bend នៃរដ្ឋ Florida កាលពីយប់ថ្ងៃព្រហស្បតិ៍ ជាព្យុះប្រភេទទី ៤ ដ៏គ្រោះថ្នាក់។ ព្យុះសង្ឈរា ហេលេន គឺជាព្យុះទី៣ដែលបានវាយប្រហារតំបន់ Big Bend ក្នុងរយៈពេល១៣ ខែចុងក្រោយនេះ។ 

ដោយចុះខ្សោយកម្លាំង ព្យុះ ហេលេន បានបង្កឲ្យមានទឹកជំនន់នៅ រដ្ឋ Carolinas និង Tennessee ខណៈមានភ្លៀងធ្លាក់យ៉ាងខ្លាំង ដោយបានធ្វើឲ្យទឹកក្នុងព្រែក ទន្លេ និងទំនប់វារីអគ្គិសនីនានាពេញហៀរច្រាំង។  

អ្នកស្រុកជាង២,៥លាននាក់នៅក្នុងរដ្ឋ Florida រដ្ឋ ចចា (Georgia) រដ្ឋ Carolinas រដ្ឋ Tennessee និងរដ្ឋ វើជីនៀ (Virginia)ពុំមានថាមពលប្រើប្រាស់ទេ កាលពីរសៀលថ្ងៃអាទិត្យ ៕