ប្រទេសអារ៉ាប់រួម បាននិយាយនៅព្រឹកថ្ងៃចន្ទ ទី៣០ ខែកញ្ញានេះថា លំនៅឋានរបស់ឯកអគ្គរដ្ឋទូតរបស់ខ្លួននៅទីក្រុង Khartoum ត្រូវបានវាយប្រហារដោយយន្តហោះយោធាស៊ូដង់ ដោយបានថ្កោលទោសថាជា «ការវាយប្រហារដ៏ឃោឃៅ»។

ក្រសួងការបរទេសរបស់ប្រទេសអារ៉ាប់រួម បាននិយាយនៅក្នុងសេចក្តីថ្លែងការណ៍ថា ការវាយប្រហារទៅលើលំនៅឋានរបស់ឯកអគ្គរដ្ឋទូតរបស់ខ្លួន បានបង្កការខូចខាតធ្ងន់ធ្ងរដល់អគារ។ កងទ័ពប្រទេសស៊ូដង់ ពុំបានធ្វើអត្ថាធិប្បាយភ្លាមៗចំពោះការចោទប្រកាន់ នេះទេ។

សេចក្តីថ្លែងការណ៍បាននិយាយថា ក្រសួងបានបញ្ជាក់ពីសារៈសំខាន់នៃការការពារអគារការទូត និងកន្លែងស្នាក់នៅរបស់បុគ្គលិកស្ថានទូត ដោយអនុលោមទៅតាមសន្ធិសញ្ញា ដែលគ្រប់គ្រងទំនាក់ទំនងផ្នែកការទូត។

កងទ័ពប្រទេសស៊ូដង់ បានចោទប្រកាន់ប្រទេសអារ៉ាប់រួមដដែលៗថា បានផ្តល់សព្វាវុធ និងជំនួយដល់កងកម្លាំងគាំទ្ររហ័សយោធាប៉ារ៉ា(RSF) នៅក្នុងសង្គ្រាមដែលមានរយៈពេល១៧ ខែ របស់ប្រទេសស៊ូដង់ ប៉ុន្តែរដ្ឋឈូងសមុទ្រមួយនេះ បានបដិសេធចំពោះការចោទប្រកាន់។

អង្គការឃ្លាំមើលការដាក់ទណ្ឌកម្មរបស់អង្គការសហប្រជាជាតិ បានចាត់ទុកការចោទប្រកាន់ដ៏គួរឱ្យជឿជាក់នេះថា ប្រទេសអារ៉ាប់រួម បានផ្តល់ការគាំទ្រផ្នែកយោធាដល់កងកម្លាំងគាំទ្ររហ័សយោធាប៉ារ៉ា។