​បាល់ទាត់៖ ក្រុមបាល់ទាត់​អង្គ​រថា​យ​ហ្គឺ​របាន​ស្គាល់​ជ័យជម្នះ​លើកដំបូង ក្រោយ​ខកខាន​អស់​រយៈពេល ១០​សប្ដាហ៍បន្ទាប់ពី​បន្ដ​យកឈ្នះ​ក្រុម​កងយោធពល​ខេមរភូមិន្ទ​(Tiffy Army) ដោយ​លទ្ធផល ២-១ ក្នុងជំនួប​ជើង​ទី​២ នៅ​កីឡដ្ឋាន​ស្ដា​ត​ចាស់កាលពី​ល្ងាច​ថ្ងៃទី​២៩ ខែកញ្ញា ឆ្នាំ​២០២១ ម្សិលមិញ។​

​ជំនួប​ដ៏​តានតឹង​នេះត្រូវបាន​អូសបន្លាយរហូត​នាទី​៦៣ ទើប​មាន​គ្រាប់​បាត់​កើតឡើង ដោយ​ផ្ដើម​ពី​ការ​តែ​ត​បំប៉ោង​សំណាញ់​ទី​ក្រុម​ម្ចាស់ផ្ទះ ១​គ្រាប់​ពី​សំណាក់​កីឡាករ​អង្គ​រថា​យ​ហ្គឺ​រ Tatela Maksim។ ប៉ុន្ដែ ៧​នាទី​ក្រោយមកខ្សែបម្រើ​កូរ៉េខាងត្បូង Chanyong Ha ក៏​រកបាន​គ្រាប់​តាម​ស្មើ ១-១ ឲ្យ​ក្រុម​កងយោធពល​ខេមរភូមិន្ទ​វិញតាមរយៈ​ការទា​ត់បាល់​ពិន័យ ១១​ម៉ែត្រ នៅ​នាទី​៧០។​ ​ឈានដល់​ចុង​ម៉ោង ការប្រកួត​កាន់តែ​ក្ដៅគគុក​ថែមទៀតបន្ទាប់ពី​ក្រុម​ទាំងពីរ ព្យាយាម​ដាក់​សម្ពាធ​គ្នា​ទៅវិញទៅមក គ្រា​ដែល​នាទី​៨២ កីឡាករ Da Cruz បានធ្វើការ​ទាត់​បាល់​ពិន័យ​ហ្វ្រី​ឃី​ត​បំប៉ោង​សំណាញ់​ទី​ក្រុម​លោក Lee Tae Hoon ពី​ចម្ងាយ​យ៉ាង​ល្អ ដែលជា​បាល់​ជ័យជម្នះ​ឲ្យ​ក្រុម​អង្គ​រថា​យ​ហ្គឺ​របន្ដ​កំណត់ត្រា​ឈ្នះ ២-១ លើ​ក្រុម​កងយោធពល​ខេ​មរ​ភូមិ​ន្ទុដូច​កាលពី​ជើង​ទី​១ តែម្ដង។​

​នេះ​គឺជា​ជ័យជម្នះ​លើកដំបូង​របស់​ក្រុម​អង្គ​រថា​យ​ហ្គឺ​រ បើ​គិត​ចាប់ពី​ការប្រកួត​សន្សំ​ពិន្ទុ សប្ដាហ៍​​ទី​៨ ជើង​ទី​១ រហូតដល់​សប្ដាហ៍​ទី​១៧ នៃ​ជើង​ទី​២ ដ្បិត​កាលពី​ដើមរដូវ​កាល ពោលគឺ ៧​ប្រកួត​ដំបូងក្រុម​មាន​មូលដ្ឋាន​នៅ​ខេត្តសៀមរាប​នេះ ធ្វើបាន​យ៉ាង​ល្អ​ជាមួយ​កំណត់ត្រា​ឈ្នះ ៦ និង​ស្មើ១ មិន​ស្គាល់​ពាក្យ​ចាញ់​សោះ។ ជ័យជម្នះ​លើកដំបូង​ក្នុង​វគ្គ Top-8 នេះដែរ បានធ្វើ​ឲ្យ​អង្គ​រថា​យ​ហ្គឺ​ររំកិល​ទៅ​ឈរ​លេខ​៦ និង​មាន ២៤​ពិន្ទុបន្ទាប់ពី​ឆ្លងកាត់ ១៥​ប្រកួត​ឈ្នះ ៧ ស្មើ ៣ និង​ចាញ់ ៥។​ ​ដោយឡែក​ការបរាជ័យ​ក្នុង​ដី​របស់​ក្រុម​កងយោធពល​ខេមរភូមិន្ទ បានធ្វើ​ឲ្យ​ពួកគេធ្លាក់​មកឈរ​លេខ​៧ វិញដោយ​រក្សា ២១​ពិន្ទុ​ក្នុង​ដៃជាមួយ​លទ្ធផល ១៦​ប្រកួត​ឈ្នះ​៦ ស្មើ ៤ និង​ចាញ់ ៦ប្រកួត ហើយ​ការបរាជ័យ​នេះដែរក៏​ធ្វើ​ឲ្យ​ក្រុម​លោក Lee Tae Hoon ក្លាយជា​ក្រុមទី​២ ក្នុងចំណោម​ក្រុម​បេក្ខភាព Top-8 ដែល​អស់​ឱកាស​ប្រជែង​ជើងឯក​លី​គ​កំពូល​កម្ពុជាឆ្នាំ​២០២១ ជា​ផ្លូវការបន្ទាប់ពី​ក្រុម​គិរីវង់​សុខ​សែន​ជ័យ​ផងដែរ៕

​អត្ថបទ៖ លី ឈុន​ឡា