នាយករដ្ឋមន្ត្រីចាំផ្ទះលីបង់ លោក Najib Mikati បាននិយាយថា រដ្ឋាភិបាលលីបង់ បានត្រៀមរួចជាស្រេច ដើម្បីអនុវត្តទាំងស្រុងនូវសេចក្ដីសម្រេចរបស់អង្គការសហប្រជាជាតិ (UN) ដែលមានគោលបំណងបញ្ចប់វត្តមានប្រតិបត្តិការប្រដាប់អាវុធរបស់ក្រុមហេសបូឡា នៅភាគខាងត្បូងទន្លេ Litani ដែលជាផ្នែកនៃកិច្ចព្រមព្រៀងបញ្ឈប់សង្គ្រាម ជាមួយអ៊ីស្រាអែល។

លោក Mikati បានប្រាប់ថា ប្រទេសលីបង់បានត្រៀមខ្លួនជាស្រេចហើយ ដើម្បីអនុវត្តទាំងស្រុងនូវសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ លេខ 1701 និងដាក់ពង្រាយកងទ័ព នៅភាគខាងត្បូងនៃទន្លេ ដែលមានចម្ងាយប្រហែល ៣០គីឡូម៉ែត្រ ពីព្រំដែនភាគខាងត្បូងលីបង់។

ជាមួយគ្នានេះ លោក Mikati ក៏បានលើកឡើងផងដែរថា លោក និងប្រធានសភា លោក Nabih Berri បានព្រមព្រៀងគ្នាថា ការបោះឆ្នោតជ្រើសរើសប្រធានាធិបតីថ្មី ដើម្បីបញ្ចប់តំណែងដ៏កំពូល ដែលនៅទំនេរជិត ២ឆ្នាំនេះ នឹងកើតមានឡើង លុះត្រាណាតែបទឈប់បាញ់បានឈានដល់ ដោយនេះជាការកត់សម្គាល់ដែលធ្វើឡើងបន្ទាប់ពីអ្នកទាំង២ បានជួបគ្នានៅទីក្រុងបេរូត។

គួរបញ្ជាក់ថា កងកម្លាំងអ៊ីស្រាអែល បានវាយប្រហារជាច្រើនដងទៅលើក្រុមហេសបូឡា ក្នុងរយៈពេល ២សប្តាហ៍នៃការវាយប្រហារលើគោលដៅ ក្នុងប្រទេសលីបង់ ដែលបានបណ្ដាលឲ្យមេបញ្ជាការជាច្រើនរូបរបស់ក្រុមនេះបាត់បង់ជីវិត។ លទ្ធភាព ដែលថា វិធានការបន្ទាប់របស់អ៊ីស្រាអែល អាចជាការបញ្ជូនកងទ័ពផ្លូវគោក និងរថក្រោះ ឆ្លងកាត់ព្រំដែននោះ កំពុងវិលវល់នៅក្នុងគំនិតមនុស្សជាច្រើន។

ក្រសួងសុខាភិបាលលីបង់បានប្រាប់ថា ពលរដ្ឋលីបង់ជាង ១.០០០នាក់ ត្រូវបានសម្លាប់ និង ៦.០០០នាក់បានរងរបួស ក្នុងរយៈពេល ២សប្តាហ៍ចុងក្រោយនេះ តែមិនបានបញ្ជាក់ថា តើមានជនស៊ីវិលប៉ុន្មាននាក់នោះទេ ដែលបាត់បង់ជីវិត៕