​បាល់ទាត់៖ ​អ្នកចាត់ការ​ក្រុម Barcelona លោក Ronald Koeman បាន​និយាយថា គ្មាន​សូម្បី​មួយ​ភាគ​ក្នុងការ​ប្រៀបធៀប​ក្រុម​ទៅនឹង Barcelona ពីមុន​ក្រោយ​រង​បរាជ័យ​ធ្ងន់​ករ​នៅ​ទឹកដី Benfica ៣-០ ប្រកួត​ទី២ ក្របខណ្ឌ UEFA Champions League ពូ​ល E​។​

​​បន្ទាប់ពី​ចាញ់ Bayern Munich ៣-០ ប្រកួត​ទី១ ក្នុង​ទឹកដី​ខ្លួនឯង ប្រកួត​ទី​ពីរ​នៅ​ទឹកដី​ព័រទុយហ្កាល់ Benifca រកបាន​គ្រាប់​នាំមុខ​នៅ​នាទី​ទី៣ ដោយ​ខ្សែប្រយុទ្ធ​អ៊ុយ​រូ​ហ្កា​យ Darwin Nunez​។ ​​ឈានចូល​វគ្គ​ទី២ Rafael Silva បន្ថែម​គ្រាប់​នាំមុខ ២-០ ឱ្យ Benfica មុនពេល​ដែល Darwin Nunez ដដែល​រកបាន​គ្រាប់​ទី​ពីរ​របស់ខ្លួន​ដោយ​បាល់ ១១ម៉ែត្រ​នៅ​នាទី​ទី៧៩​។​ ​​Barcelona ដែល​ធ្លាប់​មានឈ្មោះ​អុកឡុក​ការប្រកួត​ក្នុង​តំបន់​អឺរ៉ុប​នោះ តែ​នៅពេលនេះ​កំពុង​ឈរ​បាត​តារាង​នៃ​ពូ​ល E នេះ​គ្មាន​ពិន្ទុ​រាប់​ប្រឈម​នឹង​ធ្លាក់​ត្រឹម​វគ្គ​វិលជុំ​ក្នុង​ពូ​ល​។ ​​ចុងក្រោយ​បំផុត​ដែល Barcelona ឡើង​មិន​ផុត​វគ្គ​វិលជុំ​ក្នុង​ពូ​ល​គឺ​តាំងពី​រដូវ​កាល ២០០០-២០០១ នៅ​ពេល​ពួកគេ​ចាញ់ Besiktas និង AC Milan នៅក្នុង​ពូ​ល​។

​​ងាក​មក​ក្រុម​ជើងឯក​ឆ្នាំ២០២០ Bayern Munich បាន​បន្ត​ពីរ​ប្រកួត​ឥតខ្ចោះ​របស់ខ្លួន​ក្រោយ​បំបាក់ Dynamo Kyiv ៥-០​។​ ​​ខ្សែប្រយុទ្ធ​ប៉ូឡូញ Robert Lewandowki រកបាន​ពីរ​គ្រាប់​ម្នាក់ឯង​ក្នុង​ជ័យជំនះ​នេះដែលជា​ការ​ស៊ុត​បញ្ចូល​ទី ៦ប្រកួត​ជាប់​គ្នា​នៅ UCL នេះ​។ ​​បី​គ្រាប់​ទៀត​របស់ Bayern Munich ធ្វើបាន​ដោយ Serge Gnabry, Leroy Sane និង Choupo-Moting​។ ​​បី​ពិន្ទុ​នេះ​ធ្វើឱ្យ Bayern Munich បន្ត​ឈរលើ​គេ​ក្នុង​ពូ​ល​មាន ៦ពិន្ទុ​ពេញ ​ខណៈ Benfica លេខ២ មាន ៤ពិន្ទុ Dynamo Kyiv លេខ៣ មាន ១ពិន្ទុ​៕

​អត្ថបទ​៖​នាង សុភា​វុ​ធ