ក្រុមអ្នកស្វែងរក និងជួយសង្គ្រោះ ក្នុងរដ្ឋធានីរបស់ប្រទេសនេប៉ាល់ កាលពីថ្ងៃចន្ទ (ទី៣០ ខែកញ្ញា) បានដើររុករកតាមផ្ទះសម្បែងដែលរងការខូចខាត បន្ទាប់ពីទឹកបាន​ស្រកពីទឹក​ជំនន់​ខ្យល់​មូសុង ដែលបានសម្លាប់មនុស្សយ៉ាងហោចណាស់ ២០៩នាក់ នៅជុំវិញ​សាធារណ​រដ្ឋ​ហិមាល័យ​។

គួរបញ្ជាក់ថា ទឹកជំនន់ និងបំណាក់ដីដែលបណ្ដាលឲ្យមានមនុស្សបាត់បង់ជីវិត គឺជារឿង​តែង​កើត​មាន​ធម្មតា នៅទូទាំងអាស៊ីខាងត្បូង ក្នុងរដូវខ្យល់មូសុង ចាប់ពីខែមិថុនា ដល់ខែកញ្ញា ប៉ុន្តែ​អ្នក​ជំនាញ លើកឡើងថា បម្រែបម្រួលអាកាសធាតុ កំពុងធ្វើឲ្យគ្រោះធម្មជាតិ​នេះ​មាន​សភាព​កាន់​តែ​អាក្រក់​ទៅៗ។

បន្ទាប់ពីមានភ្លៀងធ្លាក់ខ្លាំងបំផុតមិនធ្លាប់មាន ក្នុងរយៈពេលជាង ២ទសវត្សរ៍ សង្កាត់ទាំងមូល ក្នុងទីក្រុង Kathmandu ត្រូវបានជន់លិច ដោយរដ្ឋធានីមួយ​នេះ​ត្រូវ​បាន​កាត់​ផ្តាច់​ចេញ​ពីតំបន់​ផ្សេងទៀ​តរបស់ប្រទេសនេប៉ាល់ជាបណ្តោះអាសន្ន បន្ទាប់ពីបំណាក់ដី បានបិទផ្លូវហាយ​វេ​មិន​ឲ្យ​ធ្វើ​ចរាចរណ៍បាន។

ក្រសួងមហាផ្ទៃនេប៉ាល់ បានឲ្យដឹងថា មានមនុស្សយ៉ាងតិច ២០៩នាក់ ស្លាប់ នៅទូទាំងប្រទេស និង២៩នាក់ទៀត បាត់ខ្លួន។ អ្នកនាំពាក្យក្រសួងមហាផ្ទៃ លោក Rishi Ram Tiwari បានប្រាប់​សារ​ព័ត៌មាន AFP ថា៖ «យើងបានបង្កើនការជួយសង្គ្រោះ តាមអាកាស សម្រាប់អ្នកមានជំងឺ ឬនៅ​តែ​ត្រូវការនាំយកអ្នកទាំងនោះទៅកាន់ទីសុវត្ថិភាព»។

ក្រសួងមហាផ្ទៃបាននិយាយថា ខ្លួនកំពុងធ្វើការ ដើម្បីជួយសង្គ្រោះមនុស្សជាច្រើន ដែលបានជាប់ នៅលើផ្លូវហាយវ៉េ ហើយប្រាប់ទៀតថា មនុស្សជាង ៤០០នា ក់ត្រូវបានជួយ​សង្គ្រោះ​ពី​ស្រុក​ផ្សេង​ៗ កាលពីថ្ងៃចន្ទ។

ក្រុមអ្នកជួយសង្គ្រោះផ្សេងទៀត កំពុងប្រើប៉ែល ដើម្បីកាយភក់ចេញពីសង្កាត់មាត់ទន្លេដែល​រងគ្រោះ​ខ្លាំងជាងគេ នៅជុំវិញក្រុង Kathmandu ដែលភាគច្រើនជា​តំបន់សំណង់​មិនរៀប​រយ​គ្មានការអនុញ្ញាត៕