បើ​យោងតាមក្រិត្យរបស់វិមានក្រឹមឡាំងដែលបានចេញផ្សាយ នៅថ្ងៃចន្ទនេះ បានឲ្យដឹងថា ប្រធានា​ធិបតីរុស្ស៊ី លោក Vladimir Putin បានបញ្ជាឲ្យកេណ្ឌទាហានថ្មីចំនួន ១៣៣.០០០នាក់ នៅ​ក្នុងសេចក្តីព្រាងច្បាប់រដូវស្លឹកឈើជ្រុះរបស់រុស្ស៊ី ដែលចាប់ផ្តើមនៅថ្ងៃទី១ ខែតុលា និងបន្ត​រហូត​ដល់​ដំណាច់ឆ្នាំនេះ។

ក្រឹត្យនេះដែលត្រូវបានបោះពុម្ពផ្សាយ នៅក្នុងទំព័រសារព័ត៌មានគ្រប់គ្រងដោយរដ្ឋរុស្ស៊ី Rossiyskaya Gazeta អំពាវនាវឲ្យអនុវត្តតាមការជ្រើសសម្រាំងពលរដ្ឋ «អាយុចន្លោះពី ១៨ឆ្នាំ ទៅ ៣០ឆ្នាំ ដែលមិនមាននៅក្នុងកម្លាំងបម្រុង និងត្រូវកេណ្ឌឲ្យចូលធ្វើទាហាន ស្របតាម​ច្បាប់​សហព័ន្ធ​ចំនួន ១៣៣.០០០ នាក់»។

ប្រធានការិយាល័យកេណ្ឌទាហានរបស់រុស្ស៊ី លោកអនុឧត្តមនាវីឯក Vladimir Tsimlyansky បាន​និយាយថា លក្ខខណ្ឌកំណែន នៅដដែល ពោលគឺបម្រើរយៈពេល ១២ខែក្នុងអង្គភាពយោធា នៅ​ប្រទេសរុស្ស៊ី។ ហើយសារព័ត៌មាន Rossiyskaya Gazeta បានដកស្រង់សម្តីរបស់លោក Tsimlyansky ដែលនិយាយទៀតថា៖ «ខ្ញុំចង់ផ្ដល់ការកត់សម្គាល់ជូនថា ទាហា​ន​នឹង​មិន​ត្រូវ​បាន​កោះ​ហៅឲ្យចូលរួម ក្នុងប្រតិបត្តិការយោធាពិសេស នៅក្នុងតំបន់ថ្មីទេ»។

គួរបញ្ជាក់ថា ដោយបានចាប់ផ្តើមការលុកលុយពេញលេញ ក្នុងខែកុម្ភៈ ឆ្នាំ២០២២ រុស្ស៊ីហៅសង្រ្គាមរបស់ខ្លួននៅអ៊ុយក្រែនថា ជាប្រតិបត្តិការយោធាពិសេស។ តែទីក្រុងគីវ និងសម្ព័ន្ធមិត្តរបស់ខ្លួន ហៅថា ជាការប៉ុនប៉ងចក្រពត្តិនិយម និងមិនសមហេតុផល ដើម្បីដណ្តើមយកដែនដី៕