អ្នកបោះឆ្នោតរាប់ពាន់នាក់ បានមកតម្រង់ជួរដើម្បីបោះឆ្នោតរបស់ពួកគេនៅក្នុងដំណាក់កាលទី៣ និងចុងក្រោយនៃការបោះឆ្នោតខេត្ត នៅតំបន់ Jammu និងតំបន់ Kashmir របស់ប្រទេសឥណ្ឌា នៅថ្ងៃអង្គារ ទី១ ខែតុលានេះ សម្រាប់ការបោះឆ្នោតលើកដំបូងនៅក្នុងតំបន់ក្នុងរយៈពេលជាងមួយទសវត្សរ៍មកនេះ។ អ្នកបោះឆ្នោត បានរង់ចាំក្នុងជួរដាច់ដោយឡែកសម្រាប់បុរស និងស្ត្រី បាននិយាយថា ពួកគេកំពុងបោះឆ្នោតលើបញ្ហាសំខាន់ៗដូចជា ភាពអត់ការងារធ្វើ និងសុវត្ថិភាពរបស់ប្រជាជនក្នុងពេលមានអំពើសកម្មប្រយុទ្ធរាលដាល។

ការបោះឆ្នោតក្នុងដំណាក់កាលទីបី កំពុងប្រព្រឹត្តទៅនៅទូទាំងមណ្ឌលបោះឆ្នោតចំនួន៤០។ មនុស្សជិត៩លាននាក់ បានចុះឈ្មោះបោះឆ្នោតសម្រាប់ការបោះឆ្នោតសភានៅតំបន់ Jammu និងតំបន់ Kashmir ។

ការសម្រេច រៀបចំការបោះឆ្នោតថ្នាក់តំបន់ជាលើកដំបូងក្នុងរយៈពេលមួយទសវត្សរ៍មកនេះ កើតឡើងបន្ទាប់ពីតុលាការកំពូលរបស់ប្រទេសឥណ្ឌា បានគាំទ្រសេចក្តីសម្រេចរបស់រដ្ឋាភិបាលដើម្បីលុបចោលស្ថានភាពពិសេសក្នុងតំបន់។

សន្លឹកឆ្នោតនឹងត្រូវបានរាប់ ហើយលទ្ធផលនឹងត្រូវបានប្រកាសនៅថ្ងៃទី០៨ ខែតុលា។ នាយករដ្ឋមន្ត្រីលោក Narendra Modi បានដកស្វ័យភាពពិសេសរបស់តំបន់ Jammu និងតំបន់ Kashmir កាលពីឆ្នាំ២០១៩ និងបានបំបែកអតីតរដ្ឋនេះទៅជាដែនដីសហព័ន្ធចំនួនពីរ ក្នុងគោលបំណងរឹតបន្តឹងការកាន់កាប់របស់ខ្លួនលើតំបន់ដែលភាគច្រើនកាន់សាសនាឥស្លាម។

តំបន់នេះស្ថិតនៅចំកណ្តាលនៃភាពច្របូកច្របល់ជាច្រើនទសវត្សរ៍រវាងប្រទេសឥណ្ឌា និងប៉ាគីស្ថាន ចាប់តាំងពីទទួលបានឯករាជ្យពីអាណានិគមអង់គ្លេស៕