ប្រធានទីភ្នាក់ងារអង្គការសហប្រជាជាតិ ទទួលបន្ទុកជនភៀសខ្លួនប៉ាឡេស្ទីន(UNRWA) បានបង្ហាញថា មេបញ្ជាការជាន់ខ្ពស់របស់ក្រុមហាម៉ាស ដែលត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែល នៅប្រទេសលីបង់ គឺជាបុគ្គលិកម្នាក់ក្នុងចំណោមបុគ្គលិករបស់អង្គការនេះ។

កាលពីថ្ងៃចន្ទ អគ្គស្នងការនៃអង្គការ UNRWA លោក Philippe Lazzarini បានប្រាប់អ្នក​សារព័ត៌​មាន​នៅទីក្រុងហ្សឺណែវ ថា បុគ្គលិករូបនេះត្រូវបានព្យួរការងារកាលពីខែមីនា បន្ទាប់​ពី​ការ​ចោទ​ប្រកាន់បានលេចឡើងអំពីទំនាក់ទំនងរបស់បុគ្គលនេះ ជាមួយក្រុមហាម៉ាស។

អគ្គ​ស្នងការ បាននិយាយថា បុគ្គលិករូបនេះកំពុងស្ថិតនៅក្រោមការស៊ើបអង្កេត ហើយ​លោក​បាន​បដិសេធ​មិន​បានដឹងនោះទេថា បុគ្គលនេះ ជាមេបញ្ជាការរបស់ក្រុមហាម៉ាស។

ទីភ្នាក់ងារអង្គការសហប្រជាជាតិ ពឹងផ្អែកលើសហរដ្ឋអាមេរិក និងបណ្តាប្រទេសអ៊ឺរ៉ុប សម្រាប់ការ​ផ្តល់​មូល​និធិភាគច្រើនរបស់ខ្លួន។ ទីភ្នាក់ងារ ត្រូវបានគេរំពឹងថានឹងខ្វះមូលនិធិប្រហែល​៨០លាន​ដុល្លារ​នៅចុងឆ្នាំនេះ ខណៈលោក Lazzarini បានស្វែងរកជំនួយពីប្រទេសនានា៕