និស្សិតអាហ្សង់ទីនរាប់ម៉ឺននាក់ បានចេញតវ៉ានៅតាមដងផ្លូវកាលពីថ្ងៃពុធ (០២ តុលា) ប្រឆាំងនឹងការកាត់បន្ថយការចំណាយយ៉ាងខ្លាំងនៅសាកលវិទ្យាល័យរដ្ឋដោយរដ្ឋាភិបាលសេរីនិយមរបស់លោកប្រធានាធិបតី ហាវីយ៉េ មីឡៃ (Javier Milei)។

ការតវ៉ានេះត្រូវបានរៀបចំឡើង បន្ទាប់ពីរដ្ឋបាលបានគំរាមវេតូច្បាប់ដែលសភាបានអនុម័តកាលពីប៉ុន្មានសប្តាហ៍មុន ដើម្បីធានាការផ្តល់មូលនិធិនៅសាកលវិទ្យាល័យ ខណៈប្រទេសអាហ្សង់ទីន ប្រឈមនឹងវិបត្តិសេដ្ឋកិច្ចជាមួយនឹងអតិផរណាប្រចាំឆ្នាំជិត ២៤០% និងជាងពាក់កណ្តាលនៃចំនួនប្រជាជនរបស់ខ្លួនកំពុងស្ថិតនៅក្នុងភាពក្រីក្រ។

លោក រីខាដូ ហ្កែលពី (Ricardo Gelpi) ប្រធានសាកលវិទ្យាល័យ ប៊ុយណូស៊ែរ (Buenos Aires) បាននិយាយនៅក្នុងសេចក្តីថ្លែងការណ៍មួយថា “រដ្ឋាភិបាលមានផែនការជាប្រព័ន្ធ យុទ្ធសាស្ត្រ និងជាបណ្តើរៗ ដើម្បីបំផ្លាញការអប់រំសាធារណៈ”។ រដ្ឋាភិបាលរបស់លោក Milei បានធ្វើយុត្តិកម្មម្តងហើយម្តងទៀតលើការកាត់ថវិកា ដោយចាត់ទុកសាកលវិទ្យាល័យរដ្ឋថាជាទីតាំងនៃលទ្ធិសង្គមនិយម ប៉ុន្តែស្ថាប័នអប់រំទាំងនេះមានកេរ្តិ៍ឈ្មោះខ្លាំងក្នុងចំណោមពលរដ្ឋអាហ្សង់ទីន។

បន្ទាប់ពីការតវ៉ា ការិយាល័យរបស់លោក Milei បានបន្តសន្យាថានឹងវេតូការជំរុញដែល “គ្មានទំនួលខុសត្រូវ” ដើម្បីបង្កើនការចំណាយលើសាកលវិទ្យាល័យជាតិ ក៏ដូចជាសំណើណាមួយដែល “គំរាមកំហែងដល់សមតុល្យសារពើពន្ធ”។ 

គួររម្លឹកថា កាលពីខែមេសា ការតវ៉ាដែលបានទាក់ទាញនិស្សិត និងគ្រូបង្រៀនរាប់សែននាក់ បានបង្ខំឱ្យលោ Milei ពិចារណាឡើងវិញពីការកាត់បន្ថយថវិកាថ្នាក់ឧត្តមសិក្សា ប៉ុន្តែអាជ្ញាធរសាកលវិទ្យាល័យ និយាយថា រដ្ឋាភិបាលមិនបានធ្វើការកែលម្អតាមការសន្យានោះទេ៕