មេបញ្ជាការកងរក្សាសន្តិភាពរបស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា កងរក្សាសន្តិភាព នៅភាគខាងត្បូងប្រទេសលីបង់ នៅតែបន្តស្នាក់នៅដដែល ទោះបីជាអ៊ីស្រាអែល បានស្នើឱ្យពួកគេភៀសខ្លួនចេញ ក៏ដោយ ។

មេបញ្ជាការកងរក្សាសន្តិភាពអង្គការសហប្រជាជាតិ បាននិយាយទៅកាន់អ្នកសារព័ត៌មានថា «កងរក្សាសន្តិភាពបន្តខិតខំប្រឹងប្រែងឱ្យអស់ពីសមត្ថភាពដើម្បីអនុវត្តអាណត្តិក្រុមប្រឹក្សាសន្តិសុខរបស់ពួកគេក្នុងស្ថានភាពលំបាកជាក់ស្តែង។

បេសកកម្ម ដែលត្រូវបានគេស្គាល់ថា UNIFIL ត្រូវបានផ្តល់អាណត្តិដោយក្រុមប្រឹក្សាសន្តិសុខដើម្បីជួយកងទ័ពប្រទេសលីបង់រក្សាតំបន់គ្មានអាវុធ និងបុគ្គលិកប្រដាប់អាវុធ។ នោះបានបង្កឱ្យមានការប៉ះទង្គិចគ្នាជាមួយក្រុមហេសបូឡាគាំទ្រដោយអ៊ីរ៉ង់ ដែលបានគ្រប់គ្រងនៅភាគខាងត្បូងប្រទេសលីបង់។

កាលពីដើមសប្តាហ៍នេះ យោធាអ៊ីស្រាអែល បានស្នើឱ្យកងរក្សាសន្តិភាពអង្គការសហប្រជាជាតិ ឱ្យរៀបចំផ្លាស់ប្តូរទីតាំងក្នុងចម្ងាយជាង៥គីឡូម៉ែត្រពីព្រំដែនរវាងអ៊ីស្រាអែល និងលីបង់ ដែលត្រូវបានគេស្គាល់ថាជាខ្សែបន្ទាត់ពណ៌ខៀវ ឱ្យបានឆាប់តាមដែលអាចធ្វើទៅបាន ដើម្បីរក្សាសុវត្ថិភាព។

សារព័ត៌មាន បានរាយការណ៍ថា កងរក្សាសន្តិភាពទាំងអស់ បច្ចុប្បន្ននេះ កំពុងស្ថិតនៅក្នុងទីតាំងរបស់ពួកគេ។ មេបញ្ជាការកងរក្សាសន្តិភាពនិយាយថា ភាគីទាំងអស់ មានកាតព្វកិច្ចគោរពសុវត្ថិភាព និងសន្តិសុខរបស់កងរក្សាសន្តិភាព ហើយលោកបានទទូចសុំលើរឿងនេះ។