កំពង់ផែនៅតំបន់ឆ្នេរភាគខាងកើត (East Coast) និងតំបន់ឆ្នេរឈូងសមុទ្រ (Gulf Coast) របស់សហរដ្ឋអាមេរិក បានចាប់ផ្តើមបើកដំណើរការឡើងវិញនៅយប់ថ្ងៃព្រហស្បតិ៍ (០៣ តុលា) បន្ទាប់ពីកម្មករនាវា និងប្រតិបត្តិករកំពង់ផែ ឈានដល់កិច្ចព្រមព្រៀងប្រាក់ឈ្នួលដើម្បីដោះស្រាយកូដកម្មដើរចេញពីការងារដ៏ធំបំផុតរបស់ឧស្សាហកម្មក្នុងរយៈពេលជិតកន្លះសតវត្សរ៍ ប៉ុន្តែផលប៉ះពាល់នៅតែមាន ដូចជាការសម្អាតជួរដ៏វែងនៃកប៉ាល់ដឹកទំនិញដែលកកស្ទះនៅកំពង់ផែជាដើម។

យ៉ាងហោចណាស់មានកប៉ាល់ដឹកទូរកុងតឺន័រចំនួន ៥៤គ្រឿងបានតម្រង់ជួរនៅខាងក្រៅកំពង់ផែក្នុងរយៈពេលបីថ្ងៃមកនេះ ដោយសារកូដកម្មបានរារាំងការទម្លាក់ទំនិញ និងគំរាមកំហែងដល់កង្វះខាតទំនិញគ្រប់យ៉ាងចាប់ពីផ្លែឈើ រហូតដល់គ្រឿងបន្លាស់រថយន្ត នេះបើយោងតាមតួលេខពីតាមដានសង្វាក់ផ្គត់ផ្គង់ អេវើស្រ្ទីម អាន់ណាលីធីកស៍ (Everstream Analytics) ខណៈកប៉ាល់ជាច្រើនទៀតត្រូវបានរំពឹងថានឹងមកដល់កំពង់ផែ។

សហជីពកម្មករកំពង់ផែអន្តរជាតិ (ILA) និងប្រតិបត្តិករកំពង់ផែអាមេរិក (USMX) បានប្រកាសពីកិច្ចព្រមព្រៀង និងការបញ្ចប់ភ្លាមៗចំពោះកូដកម្មកាលពីល្ងាចថ្ងៃព្រហស្បតិ៍។ ប្រភពបាននិយាយថា ពួកគេបានយល់ព្រមដំឡើងប្រាក់ឈ្នួលប្រហែល ៦២% ក្នុងរយៈពេល ៦ឆ្នាំ ដោយបង្កើនប្រាក់ឈ្នួលជាមធ្យមដល់ប្រហែល ៦៣ដុល្លារក្នុងមួយម៉ោង ពីតួលេខ ៣៩ដុល្លារក្នុងមួយម៉ោង នាពេលបច្ចុប្បន្ន៕