យន្តហោះយោធាជប៉ុន ដែលជម្លៀសពលរដ្ឋរបស់ពួកគេចេញពីប្រទេសលីបង់ ត្រូវបានគេមើលឃើញហោះចេញពីអាកាសយានដ្ឋានទីក្រុង Beiruនារសៀលថ្ងៃសុក្រនេះ ។

យន្តហោះ Kawasaki C-2 បានហោះចេញពីអាកាសយានដ្ឋានអន្តរជាតិ Beirut-Rafic Hariri ខណៈដែលផ្សែងហុយនៅក្បែរនោះ ហើយនិងជើងហោះហើរផ្សេងទៀត នៅតែបន្តប្រតិបត្តិការ ។

អាកាសយានដ្ឋាននៅភាគខាងត្បូងទីក្រុង Beirut ដែលស្ថិតនៅតំបន់ជាយក្រុង Dahiye ដែរនោះ គឺជាតំបន់កាន់កាប់ដោយក្រុមប្រដាប់អាវុធហេសបូឡា ។

តំបន់មួយនេះ រងការវាយប្រហាររបស់អ៊ីស្រាអែលកាលពីជិតពាក់កណ្តាលយប់ថ្ងៃព្រហស្បតិ៍ ក្រោយអ៊ីស្រាអែល បញ្ជាឲ្យប្រជាពលរដ្ឋចាកចេញពីផ្ទះសម្បែងរបស់ពួកគេ ។

ខណៈពេលនោះដែរ ក្រុមហេសបូឡា បាននិយាយថា ខ្លួនបានបាញ់រ៉ុក្កែតទៅលើទីក្រុង Safed នៅភាគខាងជើងប្រទេសអ៊ីស្រាអែល ។ 

ពួកគេបាននិយាយនៅលើបណ្តាញព័ត៌មានសង្គម Telegram ថា ការវាយប្រហារនេះ គឺដើម្បីគាំទ្រដល់ប្រជាជនប៉ាឡេស្ទីននៅក្នុងតំបន់ហ្កាហ្សាស្ទ្រីប ហើយខ្លួនក៏មានគោលបំណងការពារប្រទេសលីបង់ និងប្រជាជនរបស់ខ្លួនផងដែរ ៕