បន្ទាប់ពីប្រតិបត្តិការយោធារយៈពេលមួយឆ្នាំរវាងអ៊ីស្រាអែល និងក្រុមហាម៉ាស នៅតំបន់ហ្កាហ្សា ប្រមុខអង្គការយូនីសេហ្វ (UNICEF) បានព្រមានថា កុមារនៅក្នុងដែនដីហែកហួរដោយសង្រ្គាមមួយនេះ នឹងប្រឈមបញ្ហាធ្ងន់ធ្ងរនាពេលអនាគតដោយសារតែជម្លោះ។

នាយកប្រតិបត្តិរបស់អង្គការ UNICEF លោកស្រី Catherine Russell បានប្រាប់កម្មវិធី "Face the Nation" របស់ទូរទស្សន៍ CBS News កាលពីថ្ងៃអាទិត្យ ដោយបានកត់សម្គាល់ពីចំនួនអ្នកស្លាប់ក្នុងគ្រួសារ និងការរត់ភៀសខ្លួន ក៏ដូចជាកង្វះអាហារ និងទឹកស្អាតនៅតែបន្តកើតឡើងថា ប្រសិនបើអ្នកក្រឡេកមើលដែនដីហ្កាហ្សា ស្ថានភាពរស់នៅរបស់កុមារ ប្រៀបបាននឹងឋាននរក។

ដោយផ្ដោតលើកុមារ លោកស្រី Russell បាននិយាយ ពួកគេមានការតក់ស្លុតខ្លាំងណាស់ចំពោះអ្វីដែលកំពុងកើតឡើង។ ទោះបីជាយើងអាចទទួលបានការផ្គត់ផ្គង់បន្ថែមទៀតនៅទីនោះក៏ដោយ របួសដែលកុមារទាំងនេះកំពុងរងទុក្ខនឹងមានពេញមួយជីវិត និងសូម្បីតែបញ្ហាដែលពួកគេត្រូវប្រឈមនាពេលអនាគត។

ការប្រយុទ្ធគ្នាបានចាប់ផ្តើមកាលពីថ្ងៃទី ៧ ខែតុលា ឆ្នាំ ២០២៤ នៅពេលក្រុមយុទ្ធជនហាម៉ាសបានសម្លាប់ជនស៊ីវិលចំនួន ១.២០០ នាក់ និងចាប់ចំណាប់ខ្មាំងប្រហែល ២៥០ នាក់នៅក្នុងប្រទេសអ៊ីស្រាអែល នេះបើយោងតាមចំនួនសរុបរបស់អ៊ីស្រាអែល។

លោកស្រី បាននិយាយថា ស្ថានភាពនៅតែគ្រោះថ្នាក់ខ្លាំង ក្នុងការដឹកជញ្ជូនជំនួយមនុស្សធម៌នៅក្នុងតំបន់ហ្កាហ្សា។ទោះជាយ៉ាងណាក៏ដោយ លោកស្រីបានសរសើរអង្គការរបស់លោកស្រី ហើយថាជា រឿងជោគជ័យអំពីយុទ្ធនាការចាក់វ៉ាក់សាំងដល់កុមាររាប់ពាន់នាក់បង្កាជំងឺស្វិតដៃជើងនៅក្នុងដែនដីមួយនេះ៕